Presidenti i Këshillit Europian ka lëshuar një paralajmërim të fortë për atë çka ngjan të jetë kriza më e pazgjidhshme për vendet e BE-së, ajo e refugjatëve.
“Nuk kemi më shumë se dy muaj kohë për t’i vënë gjërat nën kontroll,” ka deklaruar Donald Tusk ndërsa po fliste në Parlamentin Europian në Strasburg ditën e shkuar.
Teksa një pjesë vendesh të hapësirës Shengen kanë rikthyer kontrollet e imtësishme në pikat kufitare, Tusk ka vijuar në fjalën e tij të sjellë në vëmendje situatën kritike: “[Takimi] i marsit i Këshillit Europian do të jetë momenti i fundit për të parë nëse funksionon strategjia jonë. Nëse nuk funksionon, kemi për t’u përballur me pasoja të rënda, të tilla si rënia e Shengenit.”
Me tematikë kryesore krizën e refugjatëve, takimi i Këshillit Europian do të mbahet më 17-18 mars.
Donald Tusk u tregua i ashpër me qeveritë e vendeve të BE-së kur tha se ato nuk i kanë përmbushur angazhimet për ta frenuar vërshimin e refugjatëve drejt Europës.
Kriza e refugjatëve dhe zgjidhja e saj zë aktualisht vendin kryesor në axhendën europiane. /tesheshi.com/
