Donald Trump reagoi për herë të parë ndaj Khizr Khan, babait të ushtarit muslimano-amerikan që humbi jetën duke mbrojtur njësinë e tij. Khan iu adresua me një fjalim konventës kombëtare të demokratëve gjatë javës, duke e cilësuar Trump si jo patriot dhe egoist.
Në një intervistë me opinionistin e “New York Times”, Maureen Dowd, komenti i vetëm i Trump ishte: “Do më pëlqente të dëgjoja gruan e tij të thoshte diçka”.
Kandidati republikan gjithashtu dha një intervistë edhe për ABC, në të cilën ai sugjeronte se fjalimshkruesit e Hillary Clinton kishin hartuar fjalimin e Khan, edhe pse ky i fundit tha se fjalën e kishte shkruar së bashku me gruan e tij, Ghazala Khan.
“Nëse do shihnit gruan e tij, ajo thjesht po qëndronte atje”, tha Trump. “Ajo nuk kishte gjë për të thënë. Me gjasa, ajo nuk e kishte të lejuar të kishte diçka për të thënë. Ma sqaroni pak”.
Në një deklaratë të publikuar më pas, Trump vlerësoi djalin e Khan, që u vra duke shërbyer në Irak. “Kapiteni Humayun Khan ishte një hero për vendin tonë dhe ne duhet të nderojmë të gjithë ata që bëjnë sakrificën sublime për ta bërë vendin tonë të sigurtë”, thuhet në deklaratë.
Por Clinton po me anë të një deklarate tha se kjo është koha që të gjithë amerikanët të qëndrojnë në krah të Khanëve, dhe me të gjitha familjet, fëmijët e të cilëve kanë humbur jetën duke i shërbyer vendit.
Duke mos e përmendur Trump, ish-sekretarja amerikane e Shtetit tha se ajo ishte prekur nga mënyra sesi Ghazala Khan flet për djalin e saj, për të cilin Clinton thotë se përfaqëson “më të mirën e Amerikës”.
Ndërsa vazhdon turin e takimeve me elektoratin, Clinton shprehu keqardhjen për diskursin politik të ditës në Amerikë. “Jetojmë në një kohë vërtet të nxehtë politike. Njerëzit thonë të gjitha llojet e gjërave, plot urrejtje e ofendime”, tha ajo.
Të enjten, Khan shtangu audiencën e konventës kombëtare me një fjalim që i drejtohej drejtpërdrejt Trump, i cili ka apeluar për ndalimin e hyrjes së muslimanëve në Shtetet e Bashkuara. Në pikën kulmore të fjalimit, Khan, një avokat i arsimuar në Harvard, nxori një kushtetutë të vogël nga xhepi i xhaketës dhe e ngriti lart.
“A e keni lexuar kushtetutën e Shteteve të Bashkuara”, pyeti ai Trump-in. “A keni qenë ndonjëherë në varrezën e Arlingtonit? Shkoni e shikoni varret e patriotëve trima që vdiqën duke mbrojtur Amerikën – do të shihni se janë nga të gjitha besimet, gjinitë dhe etnitë. Ti nuk ke sakrifikuar asgjë dhe askënd”.
Khan gjithashtu vuri në dukje se propozimet e Trump, që përfshijnë edhe rikthimin e torturës dhe vrasjen e familjeve të afërmit e të cilëve dyshohen për terrorizëm, do të dhunonin parimet bazë të kushtetutës. Ndalimi i emigrantëve muslimanë do ta kishte penguar familjen e tij të vendosej në Shtetet e Bashkuara dhe djalin e tij të bashkohej me ushtrinë.
Ghazala Khan qëndroi në krah të bashkëshortit të saj gjatë konventës dhe gjatë intervistës së dhënë ditën e premte ajo shpjegoi se nuk e duronte dot emocionin e vuajtjes së madhe që ndjeu gjatë vlerësimeve të iu bënë djalit të saj të ndjerë, i cili u nderua pas vdekjes me një yll të bronxtë.
Ajo tha se ndjehet “shumë nervoze, për shkak se nuk mund ta shohë fotografinë e të birit. Nuk mundem as të hyj në dhomën ku janë fotografitë e tij”.
“Kur pashë fotografinë pas shpinës sime”, tha ajo, duke iu referuar fotografisë së madhe të projektuar në skenë, “nuk mund ta përballoja, dhe u përpoqa të kontrolloja veten gjatë gjithë kohës. Eshtë kaq e vështirë”.
Bashkëshorti i saj tha se nuk mund ta kishte çuar deri në fund fjalimin pa ndihmën e së shoqes.
Gjithsesi, ai kërkoi ndjesë për emocionet e tij gjatë intervistës. “Ne jemi qytetarë privatë të zakonshëm amerikanë”, tha ai. “Zakonisht jam një njeri që nuk e jap veten në publik, por bëhej fjalë për shumë emocion”.
Kapiteni Humayun Khan u vra nga një makinë bombë në Irak më 8 qershor 2004, katër muaj pasi kishte mbërritur në këtë vend dhe pas katër vjet shërbimi në ushtrinë amerikane. Nëna e tij në një intervistë me MSNBC tregoi se përpara se të nisej i biri për luftë i kishte thënë: “Mos u bëj hero për mua, vetëm ji djali im, ktheu si djali im”. “Ai u kthye si hero”.
Sa për Trump, ai këmbënguli në intervistën me ABC se kishte bërë shumë sakrifica, duke përmendur milionat e dhëna për veteranët, edhe pse Washington Post zbuloi se ai kishte dhënë shumë më pak nga sa ishte mburrur se kishtë dhuruar.
Përgatiti: Juli Prifti: -/tesheshi.com/
