Lojërat Olimpike Dimërore që kanë startuar të premten në Korene e Jugut, përtej bujës së organizimit, nuk kanë patur në përmbajtje vetëm aspektin sportiv të aktivitetit, por edhe nuanca të vecanta politike.
Kështu mediat kanë shkruar gjatë për çështjen e paraqitjes së flamujve të të Dy Koreve në hapje të Olimpiadës së Pyeongchang, apo faktin se Koreja e Jugut dhe ajo e Veriut, do të përfaqësohen nga një skuadër e përbashkët në sportin e Hokejit për femra. Natyrisht kanë shkruar edhe për takimet mes përfaqësuesve të të dy vendeve, ku kanë evidentuar dhënien e dorës mes motrës së Kim Jong e zyrtarit të Koresë së Jugut.
Por mediat nuk kanë lënë pa kapur edhe një takim të papritur të dy personazheve armiq në politikë, por që pozonin së bashku e shtrëngonin duart. Kamerat e fotografët kanë përqëndruar fokusin në tribunë, kur Donald Trump dhe Kim Jong bisedonin të qeshur. Edhe pse nuk u kanë besuar syve, të gjithë kanë shtangur për takimin e panjoftuar, duke e marrë fillimisht si “proçkë” të kontroversialit Trump në Olimpiadë.
Por më pas, kur janë përqëndruar mirë, kanë vërejtur se në tribunë qëndronin sozitë e secilit prej liderve dhe jo personat realë. Madje filluan edhe komentet e para, të cilat më pas u pasuan nga një ndjesë elegante, e komentatorëve, ndoshta jo të papërgatitur për trukun publik Megjithatë, edhe kjo situatë është komentuar gjatë, bashkë me diciturat tipike: Trump edhe kur s’është…është! /tesheshi.com/
