Trump ka “ecur mbi tel” në Forumin e Davosit. Ndryshe nga Donaldi i zakonshëm, Trump është treguar i kujdesshëm, i qetë dhe sa më modest që ai mundet në dhënien e një imazhi jo përplasës me botën e bashkëpunues.
Në një fjalim të mësuar përmendësh, Presidenti i SHBA-së, edhe pse është kritikuar nga mjaft kolegë të tij, në Davos nuk ja ka kthyer asnjërit replikën.
Edhe pse është akuzuar nga armiku i tij, George Soros, madje fort, ai e ka injoruar dhe ka dhënë një mesazh pak më të zbutur se një vit më parë.
“Unë e dua shumë Amerikën dhe e vendos në vend të parë, por ‘Amerika e para’ nuk do të thotë ‘Amerika e vetme’. Si unë që e vë Amerikën të parën, edhe liderët e vendeve të tjera duhet ta vënë vendin e tyre të parin.
Ne jemi të hapur dhe kërkojmë tregëti të lirë me të gjitha vendet, mjafton që kjo tregëti të jetë pa hile dhe me përfitime reciproke”, deklaroi Trump, i cili ishte “njeriu i Davosit”, ngaqë është hera e parë që merr pjesë në Forumin Ekonomik Botëror.
Donald Trump është ndalur më mënyrë të veçantë dhe të detajuar në atë që do ta ketë dhe flamurin politik për zgjedhjet parlamentare të vitit të ardhshme, uljen e taksave.
“Ulja e taskave dhe lehtësimi i burokracive ka çliruar ekonominë dhe ka sjellë rreth 2 mijë usd për çdo punëtor që merr rrogën në kompanitë amerikane.
Kemi ulur rreth 22 tarifa fiskale që janë përkthyer në mënyrë të shpejtë në investime dhe para për punëtorët.
Vetëm Apple do të investojë 2 miliardë dollarë nga fitimet që merr jashtë në SHBA pas uljes së taksave”, tha Trump.
Në fakt sinjalet e rritjes së ekonomisë amerikane kanë qenë pozitive që para se të zgjidhej Trump, por ai po korr frytet e politikës së ndërmarrë nga Barack Obama që prej krizës së 2008 kur e mori drejtimin e SHBA-së.
Dhe është normale të korrë frytet, pasi ekonomia është në fund edhe thelbi i çdo politike qeveritare.
Megjithatë Trump, edhe në atë pak pjesë të politikës ndërkombëtare që foli nuk i fryu tensionit.
Nuk tha asnjë fjalë për Jerusalemin por foli për mundjen e ISIS-it dhe tregoi se në Afganistan, SHBA do të rimarrë rolin për të luftuar mbetjet e luftëtarëve që kanë ikur nga Iraku e Siria.
Përmendi Korenë e Veriut, ku tha se falenderonte anëtarët e OKB-së që kanë mbështetur nismën për denuklearizimin e Gadishullit Korean dhe nga ana tjetër nuk kritikoi vendet që nuk votuan rezolutën e SHBA-së për Jerusalemin.
Një Trump shumë i kujdeshshëm që i shtriu dorën e miqësisë të gjitha vendeve, nuk ka përmendur Rusinë, Kinën dhe madje asnjë shtet me emër që në të shkuarën i ka goditur në fjalët e tij.
Ndryshe nga Emanuel Macron që pati një fjalim të gjatë e të detajuar përpara industrialistëve dhe bankierëve, Trump foli thjesht dhe pak e në terma të përgjithshme.
Madje përmendi afroamerikanët dhe hispanikët, që sipas tij po përjetojnë “papunësinë më të ulët në historinë e SHBA-së”.
Stafi i tij është kujdesur që Presidenti i SHBA-së të dalë në një imazh sa më të plotë nga Davosi dhe të paprekur nga kontenstimet e polemikat. /tesheshi.com/
