Ambasadori amerikan në Tiranë, Donald Lu ka takuar sërish ish-kryeministrin Sali Berisha për të tretën herë në harkun e një jave, pas deklaratave të këtij të fundit për trazira dhe armatosje, apo edhe intervistën ku foli për një “14 shtator” tjetër.
Për këtë takim ka pasur vetëm një njoftim nga zëdhënësja e zotit Berisha, e cila thekson se: “Ambasadori Lu e njohu zotin Berisha me rëndësinë shumë të madhe që qeveria e tij i kushton kësaj reforme si dhe me punën që kanë bërë këto ditë ekspertët ndërkombëtarë.
Zoti Berisha theksoi se opozita është forca politike më e interesuar për reformën, të cilën Rama bëri gjithçka ta përjashtonte nga procesi, ndonëse asnjëherë, nuk kishte ndodhur kurrë që Kushtetuta të amendohej pa opozitën. Kjo praktikë që ndoqi Rama bëri që të humbet një vit kohë dhe dy draftet të kthehen me vërejtje thelbësore nga Komisioni i Venezias, vërejtje që në tërësi ishin paraqitur nga opozita.
Zoti Berisha shprehu besimin se nëse ekziston vullneti politik i sinqertë kjo reformë mund të votohet me konsensus të plotë në parlament”.
Ambasadori amerikan Donald Lu dhe ambasadorja e Bashkimit Europian, Romana Vlahutin, u takuan edhe me kryetarin e komisionit të reformës në drejtësi, Fatmir Xhafaj.
Takimi Lu-Berisha ka zgjatur rreth një orë. Pasdite, ambasadori amerikan dhe kryediplomatja e BE-së do të takohen edhe me kreun e PD-së, Lulzim Basha.
Opozita, në një material të gjatë që u ka dërguar ekspertëve nuk bie dakord me mënyrën sesi zgjidhen, emërohen dhe funksionojnë disa institucione të reja të drejtësisë.
/tesheshi.com/
