Donald Lu është shkundur fort pas sulmeve që i janë bërë nga një pjesë e qarqeve politike dhe zyrtare në vend.
Ka pritur një javë dhe i është kthyer gjuhës së ashpër, duke përmendur direkt njeriun që, sipas tij, po pengon ecjen përpara të vendit.
Dhe ambasadori amerikan në Tiranë nuk ka dyshim: është Adriatik Llalla, prokurori i përgjithshëm, ai që po pengon reformën.
“SHBA-ja është dhe do të vazhdojë të jetë këtu me ju për ta zbatuar reformën në drejtësi,” ka thënë Lu në një aktivitet të organizuar nga shoqëria civile.
“Për më shumë se 18 muaj, prokurori i përgjithshëm ka folur kundër reformës në drejtësi. Prokurorët u përpoqën të marrin serverin e ILDKPI-së, ku ndodheshin pasuritë e gjyqtarëve të korruptuar. Të premten e shkuar u hodh shorti për drejtësinë e re. Prokurori punoi kundër Kushtetutës, duke prishur shortin, duke mos i përzgjedhur prokurorët e duhur. Prokurori i përgjithshëm i zgjodhi prokurorët jo me short, pa transparencë,” u shpreh ambasadori Lu.
Ai ka vazhduar kështu më tej: “Krerë të krimit, gjyqtarë dhe prokurorë të korruptuar, do të përpiqen të vjedhin zgjedhjet e 18 qershorit. Ju i kuptoni kontekstet dhe i keni mësuar marifetet e qeverisë. Kjo nuk është detyrë për amatorë, ju duhet mbështetje politike dhe financiare, përvojë, besueshmëri. Ka njerëz që duan kontroll mbi gjykatën e prokurorinë.”
Ndërkaq, ambasadorja e BE-së në Tiranë, Romana Vllahutin, deklaroi se javën e ardhshme nisin punë institucionet e reja të drejtësisë, siç është Prokuroria Speciale dhe Byroja Kombëtare e Hetimit.
“Njerëzit janë skeptikë për reformën në drejtësi, pasi mendojnë se do të jetë e vështirë për t’u zbatuar. Dua t’u them se është e mundur. Javën tjetër nisin punën institucionet e reja,” tha Vllahutin. /tesheshi.com/
