Ambasadori i SHBA-së në Tiranë, Donald Lu, ka deklaruar se pastrami përfundimtar nga prokurorët dhe gjyqtarët e korruptuar do tëkërkojë më shumë se 3 vjet, ndërkohë që Byroja Kombëtare e Hetimit, organi që do të kryejë “gjuetinë e të korruptuarve” kërkon një vit të ngrihet.
Në një intervistë për BIRN, ambasadori Lu tha ““Të gjithë ne në Ambasadën Amerikane jemi të përqendruar në reformën në drejtësi për shkak të udhëzimit direkt nga zyrtarë të lartë në Shtëpinë e Bardhë dhe në Departamentin e Shtetit. Ata na kanë thënë qartësisht se prioriteti numër një i Qeverisë Amerikane në Shqipëri është të mbështesë reformat e nevojshme për pranimin e Shqipërisë në BE”.
Lu paralajmëroi se reforma e planifikuar ka gjithashtu shumë armiq dhe bëri thirrje te partitë politike në vend të qëndrojnë së bashku e ta mbështesin atë.
“Tani është koha që liderët politikë të Shqipërisë të tregojnë kurajo përballë atyre që kërkojnë të pengojnë ose ulin efektin e kësaj reforme,” tha ai.
Ambasadori paralajmëroi se shqiptarët “nuk duhet të presin një mrekulli brenda natës.
Verifikimi dhe largimi i prokurorëve dhe gjyqtarëve mund të marrë tre vite ose më shumë. Rekrutimi dhe trajnimi i Byrosë Kombëtare të Hetimit për të kryer hetimet anti-korrupsion do të kërkojë më shumë se një vit. Krijimi i këshillave të caktimit të gjyqtarëve dhe organeve disiplinuese do të marrë disa muaj kohë,” deklaroi diplomati amerikan, i cili ka qenë sërish i prerë: “SHBA-ja nuk do të gjejë qetësi” derisa procesi të përfundojë. Ne do të vazhdojmë të flasim publikisht dhe privatisht në favor të kësaj reforme. Ne inkurajojmë të gjithë shqiptarët t’i bashkohen debatit publik rreth përmbajtjes dhe ideve të kësaj reforme,” tha ai.
/tesheshi.com/
