Halid Meshali, njeriu që drejton byronë politike të Hamasit, ka paraqitur dje në Doha dokumentin e ri politik të këtij organizmi, ku nënvizohet mbështetja për krijimin e një shteti palestinez në kufijtë e vitit 1967.
Ky dokument i ri politik i pranon kufijtë e 1967-s si një bazë për shtetin palestinez, që të ketë Jerusalemin si kryeqytet, duke parashikuar gjithashtu kthimin e refugjatëve në shtëpitë e tyre.
“Hamasi mendon se krijimi i një shteti palestinez, sovran dhe të plotë, në bazë të 4 qershorit 1967, me Jerusalemin si kryeqytet të tij, e me kushtin që të gjithë refugjatët të kthehen në vendin e tyre, është një formë e pranueshme që ka fituar njëzëshmëri midis anëtarëve të lëvizjes,” sqaroi Halid Meshali në fjalën e tij.
Sa për kufijtë e vitit 1967, janë ato përpara luftës përmes së cilës Izraeli pushtoi Jerusalemin Lindor, Bregun Perëndimor dhe Rripin e Gazës.
Meshali theksoi megjithatë se Hamasi bën thirrje për çlirimin e plotë të Palestinës, por është gati për ta mbështetur krijimin e një shteti të përkohshëm palestinez.
Ndërsa Hamasi nuk e njeh Izraelin, dokumenti i ri politik e heq thirrjen e qartë për shkatërrimin e tij.
Në dokumentin e ri politik sqarohet se lufta e Hamasit është ndaj projektit sionist, e jo ndaj Judaizmit. /tesheshi.com/
