Austria, Italia, Sllovenia dhe vendet e Grupit të Vishegradit dorëzuan në Bruksel propozimin e tyre për “përmirësimin e procesit dhe integrimin e qëndrueshëm dhe të përshpejtuar të Ballkanit Perëndimor”.
Këto vende propozojnë që një “qasje e zgjeruar” të bazohet në “ruajtjen e parimeve ekzistuese”: anëtarësimin e plotë si qëllimin përfundimtar, përqëndrimin në fushat themelore, një proces pranimi të bazuar në rezultatet e arritura, kushtet e rrepta dhe të drejta, forcimin e bashkëpunimit rajonal dhe marrëdhëniet e fqinjësisë së mirë dhe të pajtueshme me kornizat ekzistuese të bisedimeve.
“Reforma e brendshme e Bashkimit Evropian nuk mund të jetë parakusht për zgjerimin. Dera jonë mbetet e hapur”, thuhet në dokumentin e tyre.
Pesë qëllime themelore
Propozimi nga nëntë Shtetet Anëtare përfshin gjithashtu pesë objektiva themelorë, i pari i të cilave është forcimi i besueshmërisë së procesit të pranimit dhe bashkëpunimit ndërinstitucional.
E dyta ka të bëjë me “mirëmbajtjen dhe përshpejtimin e përparimit në reformë”, me një përqendrim në sundimin e ligjit.
“Procesi duhet të jetë më gjithëpërfshirës dhe më pak i ndarë. Negociatat duhet të sigurojnë përgatitje më të mirë për anëtarësimin në BE dhe të çojnë në përfitime më të prekshme për qytetarët gjatë gjithë procesit”, thuhet në dokument.
Objektivi i pestë i referohet “angazhimit më aktiv” të BE-së dhe Shteteve Anëtare në pranimin e Ballkanit Perëndimor, por edhe koherencën më të mirë të partnerëve në Ballkanin Perëndimor kur bëhet fjalë për “Eurointegrimin si qëllimin e tyre strategjik”.
Një dokument i ri debati për ndryshimin e metodologjisë së pranimit të vendeve të Ballkanit Perëndimor propozon “grupimin” e kapitujve të negociatave në fushat thelbësore, strukturimin më të mirë të kapitujve të sundimit të ligjit 23 dhe 24, si dhe dhënien e “stimujve më të fortë” për të përparuar negociatat përmes përfitimeve të qarta për qytetarët e vendeve në proces.
Stimuj efektivë financiarë
“Stimujt politikë” propozohen në formën e një takimi vjetor të liderëve të Unionit me udhëheqësit e Ballkanit Perëndimor dhe rritjen e prezencës së përfaqësuesve rajonalë në takimet informale ministrore të BE, komitetet dhe grupet e punës.
“Nxitjet efektive dhe të synuara financiare duhet të aktivizohen dhe të lehtësojnë përparimin”, thuhet në tekst, të nënshkruar nga nëntë anëtarë të BE-së.
Kërkohet gjithashtu mbështetje më e fortë financiare për rajonin, rritje e investimeve dhe ulje e hendekut ekonomik dhe zhvillimit midis BE-së dhe vendeve të Ballkanit Perëndimor.
Komisionit Evropian i kërkohet të paraqesë, më qartë, më lehtë, krahasimin dhe matjen e vlerësimeve të përparimit në zbatimin e kritereve të BE-së nga vendet e pranimit.
“Përmirësimi i vlerësimit të procesit të reformës gjithashtu duhet të përfshijë ndikimin real të masave të reformës në terren”, thuhet në propozim.
Propozimet përfshijnë dhe mbajtjen e një “Konferencë për Evropën” në vendet e rajonit, disa nisma të përbashkëta nga Parlamenti Evropian dhe parlamentet e shteteve anëtare dhe Ballkanit Perëndimor, si dhe pjesëmarrjen e rajonit në “Konferencën për Ardhmërinë e Evropës”.
Komisioni Evropian do të publikojë propozimet e tij
Komisioni Evropian thotë se përveç propozimit francez, i cili ishte propozimi i parë për të ndryshuar metodologjinë e procesit të pranimit në BE, deri tani janë dorëzuar disa dokumente të tjera me të njëjtën temë.
Të gjitha Shtetet Anëtare janë të ftuar të paraqesin idetë dhe propozimet e tyre sa më shpejt të jetë e mundur.
Komisioni ka njoftuar se do të dalë me një propozim për një metodologji të re të zgjerimit në janar, i cili duhet të jetë baza për debate të mëtutjeshme dhe konsensus brenda BE-së për të ardhmen e politikës së zgjerimit. /tesheshi.com/
