Parlamenti Europian i kërkon Prokurorisë që të mbyllë sa më shpejt hetimet për çështjen Doshi, ndërsa nga Parlamenti shqiptar është kërkuar zbtimin dhe konkretizimin e dekriminalizimit të politikës, duke e kthyer përfundimisht në ligj. Në këtë dokument lihet të kuptohet se nuk bëhet fjalë vetëm për të moskandiduar njerëz me problem me ligjin në legjislaturën e vitit 2017 por largimin e menjëhershëm nëpërmjet një ligji të posaçëm.
Një draft paraprak është diskutuar sot në takimin ndërparlamentar mes Shqipërisë dhe BE-së i cili do të miratohet në mbledhjen qeveritare mes Tiranës dhe Brukselit. Drafti nis me mbështetjen e plotë të BE-së për rrugën integruese të Shqipërisë, si e vetmja alternativë për të ardhmen e vendit, por në të bëhet e qartë se hapja e negociatave është gjerësisht e mbështetur vetëm nga shpejtësia e Shqipërisë në përmbushjen e reformave kyçe. Implementimi i plotë i marrëveshjes së 24 dhjetorit PS-PD për dekriminalizimin, nënvizohet në këtë draft si një domosdoshmërie kritike, nga të gjitha forcat parlamentare. Si i tillë shihet gjithashtu dialogu politik për reformat, që përcaktojnë rrugëtimin europian të Shqipërisë.
Në draft shprehet shqetësimi për zhvillimet e fundit në vend, që lidhen me akuzat kriminale të bëra nga deputetë të Parlamentit shqiptar, dhe nxitet hetimi i shpejtë dhe i plotë nga autoritetet e drejtësisë, çka do të parandalonte përkeqësimin e klimës politike në vend. Pikat e tjera vlerësojnë ecurinë e reformave.
Ndërkaq, takimi mes deputetëve shqiptarë dhe europarlamentarëve ka përfunduar në sherrnajë si gjithmonë. Por deputetët e Parlamentit Europian nuk kanë qëndruar indiferentë. Deputeti i PD-së, ish-shefi i diplomacisë, Aldo Bumçi, kundërshtoi formatin e paraqitur në tryezë duke deklaruar se opozitës nuk i jepej koha e nevojshme për të shprehur qendrimin e saj, por bashkëdrejtuesja e këtij Komiteti tha se opozita mund të shprehte qendrimin dhe shqetësimin e saj nëpërmjet pyetjeve drejtuar ministrave të qeverisë.
Megjithatë Bumçi këmbënguli në kërkesën e tij dhe debati zgjati për disa minuta. Më pas fjalën e mori deputetja e Partisë Demokratike, Majlinda Bregu. Majlinda Bregu ngriti përpara eurodeputetëve një prej shqetësimeve të kahershme të opozitës, emërimet në administratë. (tesheshi.com)
