Nga Ermir Hoxha
Një pjesë e mirë e Top Story-t të së mërkurës, ku si temë debati ishte e dhëna kompromentuese mbi një dokument të paraqitur nga Saimir Tahiri marrë nga Prokuroria e Katanias, kaloi në komunikim telefonik mes moderatorit e të ftuarve, me avokatin e Tahirit, Maks Haxhia në linjë.
Ishte ky i fundit që kërkoi me ngulm të ishte pjesë e debatit, ku siç mund të lexohej qartë qe ballafaquar paprimtas në ekran me komente gazetareske me në qendër klientin e tij. Pra, as që ishte kontaktuar, e aq më pak ftuar të mbrojë, atë për të cilën Top Channel ishte investuar profesionalisht, investigimin, duhet thënë profesionist, mbi një dokument, nga i cili vërtet buronin dyshime mbi një akt të mundshëm falsifikues nga ana e Tahirit. Por po kaq profesioniste, ashtu sikurse dhe etike, ishte fakti që investigimi nuk mbyllej me definicionin se po, Tahiri e kishte bërë atë proçkë. Çështjen e linte të hapur, pa ia vënë Tahirit vulën e mëkatit, ku të njëjtin qëndrim mbajtën dhe referuesit mbi dokumentin, dy juristë italianë.
Por në Top Story ky lloj ekuilibri nuk reflektohej. Aty, të ftuar ishin dy emra, qartazi në llogoren anti-Tahiri: ish-gazetari i Kronikës Basir Çollaku, i rikthyer vitet e fundit në profilin e tij të dikurshëm me pasionin më shumë politik për të denoncuar aferat e drogës nën qeverinë e Ramës, si dhe Artur Zheji, pa profil të caktuar në gazetari veç atij të komentatorit të ngjarjeve, e i atashuar pranë LSI-së.
Pra, dy emra pa asnjë gjasë për të mbajtur qëndrime objektive lidhur më çështjen e re të Tahirit, zbuluar nga TCH. Dhe në këto rrethana, ishte avokati Maks Haxhia ai që, edhe pse logjikisht duhej të ishte në studio si zëri përfaqsues i Tahirit, aq më tepër kur ishte fjala për çështje të koklavitura të teknikaliteteve juridike, u fut “me pahir” në studio me anë të linjës telefonike.
Ishte kjo situatë që nxorri në pah një rrëshqitje profesionale të Ballës, gjë që për hir të së vërtetës, në Top Story-n e tij rrallë ndodh.
Top Story, padyshim që është sot top-hapësira më cilësore dhe profesionale e debatit shqiptar. Sharmant që nga sigla hyrëse, grafikat, dizanji dhe ndriçimi i studios, artikulimi i moderatorit, veshja e tij, strukturimi i debatit dhe menaxhimi i tij ku çdo gjë është me masë, ose në masën e duhur, e bën emisionin e Sokol Ballës të pakonkurueshëm në raport me atë lloj audience shijehollë që preferon të ndjekë një fjalosje mes palësh prej së cilës arrin të mësojë e të kuptojë diçka në fund, gjë e pamundur në hapësira të ngjashme. /tesheshi.com/
