Nga Bekim Laci
Në kohën kur vendi po përballet me skandalin e përgjimeve, Drejtoria e Doganave të Maqedonisë kërkon të furnizohet me pajisje për ndjekje dhe përgjim; respektivisht të zbatojë masa të veçanta hetimore. Janë këto të dhënat e publikuara nga “WikiLeaks”, në faqen e të cilit është publikuar një dokument elektronik i cili daton nga dhjetë ditë më parë. Është aty një komunikim mes Aleksandër Chokovskit, drejtor i departamentit të biznesit në kompaninë “Navajo Technologies” dhe një përfaqësuesi italian nga “Hacking Team”.
Në letër, Chokovski shkruan se kompania e tij e cila furnizon qeverinë e Shkupit me pajisje të IT-së, për nevoja sigurie, tani ka marrë një kërkesë që të sigurojë pajisje të mirë monitorimi për nevojat e doganës dhe se po hulumton për çmimin.
“Nevojat e tyre nuk janë aq të mëdha sa ato të policisë apo të ushtrisë, por sipas ligjit edhe ata mund të zbatojnë masa të posaçme hetuese”, thuhet në letrën e Chokovskit nga “Navajo Technologies “, ku qëndron se dogana për momentin është në fazë të përgatitjes së buxhetit, duke i kërkuar kompanisë “Hacking Team” që të tregojë se çfarë të dhëna shtesë do t`ju nevojiten për të vazhduar.
Në bazë të e-mail adresës së Aleksandër Chokovskit, shihet qartë se kompania “Technologies Navajo” në Maqedoni është regjistruar në rrugën ‘Dimçe Mirçev 20’, që është një ndërtesë përballë Ministrisë së Brendshme, në të cilën, sipas opozitës maqedonase qëndrojnë ish-ministrja e Brendshme, Gordana Jankullovska, ministri për Financa, Zoran Stavrevski si dhe zyrtarë dhe politikanë tjerë nga partia në pushtet VMRO.
Është vendi këtu për të kujtuar se dhe në Shqipëri pati një debat të nxehtë mbi çështjen e përgjimeve, përgjatë tre viteve të fundit të mandatit të dytë të qeverisjes Berisha. Opozita e majtë e akuzonte për blerje pajisjesh për përgjim nga ana e strukturave të Ministrisë së Mbrojtjes, që drejtohej nga Arben Imami. Sipas opozitës së atëhershme, me to ishin përgjuuar jo vetëm kundërshtarët politikë, por dhe diplomatët e rënndësishëm të Tiranës. /tesheshi.com/
