Kryeministri izraelit Benjamin Netanyahu ka probleme të rënda shëndetësore, zbulojnë dokumentet e gjykatës, raporton portali Ynetnews.
Avokati i kryeministrit tha gjatë gjyqit të tij për korrupsion se Netanyahu pati një infeksion të rëndë pas operacionit të prostatës muajin e kaluar dhe nuk ishte në gjendje të ulej, të qëndronte në këmbë ose të punonte për më shumë se tre orë pa pushim.
Netanyahu ka paraqitur një kërkesë në Gjykatën e Qarkut të Jerusalemit për të zvogëluar numrin e ditëve që duhet të dëshmojë javën e ardhshme, në mënyrë që të mund të shërohet.
Avokati i tij Amid Haddad tha se mjekët e Netanyahut kanë thënë se ai duhet të shmangë çdo aktivitet që zgjat më shumë se tre orë pa pushim, si dhe udhëtimet në distanca të gjata.
Gjyqi i kryeministrit për ryshfet, mashtrim dhe shkelje të besimit u zhvendos në Tel Aviv për shkak të shqetësimeve të sigurisë gjatë luftës.
Haddad kërkoi që Netanyahu të dëshmonte vetëm për një ditë javën e ardhshme, në vend të tre ditëve që kishte caktuar gjykata, që dëshmia të fillonte një orë më vonë dhe që ai të lejohej të pushonte gjatë dëshmisë së tij.
Haddad tha se përfshirja e Netanyahut në marrëveshjen e lirimit të pengjeve, një premtim që ai “u angazhua ta përmbushte pavarësisht gjendjes së tij shëndetësore”, e zgjati shërimin e tij.
Prokuroria tha se pas shqyrtimit të dokumentacionit mjekësor të dorëzuar në gjykatë, kundërshton uljen e numrit të ditëve që duhet të dëshmojë kryeministri.
Dëshmia e Netanyahut u vonua me muaj me kërkesë të tij, pasi ai pretendoi se ekipi i tij ligjor nuk ishte në gjendje ta përgatiste atë për shkak të luftës. Dëshmia e tij më në fund filloi dhjetorin e kaluar. /tesheshi.com/
