E njëjta organizatë mbi gazetarinë investigative, e cila bashkëpunoi me The Guardian për zbulimin e dokumenteve mbi influencën ruse në Mal të Zi dhe Maqedoni, ka publikuar dokumente nga spiunazhi rus, i cili bën të ditur se “Alarmi për Shqipërinë e Madhe” është nxitur dhe financuar nga rusët, duke përdorur Sputnik dhe mediat serbe, maqedonase por edhe në vende të tjera.
Në faqen e saj zyrtare, OÇRP thekson se rusët po propagandojnë ngritjen e Shqipërisë së Madhe, me qëllim që të dëmtojë imazhin e tyre.
“Rusia ka kritikuar zgjedhjet e dhjetorit në Maqedoni si të njollosura nga ndërhyrjet e SHBA-së dhe të BE-së, të cilat i akuzon për mbështetje ndaj Zaev dhe të projektit të Shqipërisë së Madhe, për shpërbërjen e shteteve ballkanike”, thekson dokumenti.
Në një tjetër dokument të detajuar në takimin e 7 prillit mes zyrtarit të Ministrisë së Jashtme të Maqedonisë, Nenad Kolev, dhe ambasadorit rus Oleg Shcherbak, ambasadori citohet të ketë thënë se qëllimi i Rusisë është krijimi i “një vargu shtetesh ushtarakisht neutrale” në Ballkan, të përbëra nga Mali i Zi, Bosnia-Herzegovina, Maqedonia, e Serbia.
Sipas organizatës, në vendet fqinje, por sidomos në Maqedoni, rusët po bëjnë propagandë kundër shqiptarëve. Ata po blejnë mediat, për të nxitur tensione mes fqinjëve dhe shqiptarëve.
“Agjentët rusë kanë tentuar gjithashtu të influencojnë ose të financojnë mediat e Maqedonisë, përfshi dhe ato me audiencë minoritetin shqiptar, me qëllim përhapjen e “informacionit dhe disinformacionit” në mbështetje të objektivave ruse, theksohet në raportin e OÇRP.
Konsullatat ruse të nderit në qytetet e Manastirit dhe Ohrit funksionojnë si “baza inteligjence”, thotë dokumentari.
Sipas dokumenteve, përpjekjet ruse e serbe kanë kontribuar në krizën komplekse politike në Maqedoni, i cili është gjithashtu i ndarë mes partive kryesore politike dhe tensioneve me pakicën e qetë shqiptare të vendit.
Agjentët rusë kanë punuar për rekrutimin e anëtarëve ose ish-anëtarëve të ushtrisë dhe Ministrisë së Mbrojtjes së Maqedonisë, me qëllim krijimin e një “mase kritike personash të stërvitur”, thotë dokumenti, të cilët “në një moment ose situatë të caktuar politike të përdoren për realizimin e interesave ruse”. Dokumenti nuk cilëson nëse këto tentativa kanë qenë të suksesshme.
Pas zgjedhjeve të dhjetorit opozitarët Social-Demokratë me liderin Zoran Zaev formuan qeverinë e koalicionit me dy parti shqiptare më 31 maj.
Periudha e ndërmjetme ishte mjaft e trazuar. Më 27 prill protestues nacionalistë bastisën parlamentin dhe sulmuan liderin social demokrat Zaev dhe disa të tjerë. Dokumentet e mbledhura nga OÇRP dhe partnerët tregojnë se të paktën një agjent i inteligjencës serbe ishte prezent gjatë sulmit”, thuhet në rrjetin që është i ngjashëm me BIRN dhe është i specializuar për influencën ruse.
/tesheshi.com/
