Presidenti ukrainas, Petro Poroshenko, ka nënshkruar dje dekretin që e miraton doktrinën e rishikuar ushtarake të Ukrainës, e cila e paraqet Rusinë si kërcënimin kryesor për sigurinë e vendit.
Në këtë material të rishikuar thuhet se, “Kërcënimi i vërtetë ushtarak sot për Ukrainën është agresioni ushtarak i Rusisë, që përfshin pushtimin e përkohshëm të Krimesë dhe agresionin në disa zona të rajoneve të Doneckut dhe Luhanskut.”
Doktrina përmend gjithashtu kërcënimet potenciale nga Rusia, si përqëndrimin ushtarak të Rusisë në afërsi të kufirit shtetëror, dislokimin e armëve bërthamore taktike në Krime, si dhe praninë e kontingjenteve ushtarake ruse në Transnistria.
Po ashtu aty citohet si një kërcënim i mundshëm aktiviteti i grupeve të armatosura ilegale në Ukrainë, që nuk e lejon ushtrimin e autoritetit në rajonet e vendit.
Zgjidhja e krizës në Ukrainën lindore është parë në dokument si një prej synimeve kryesore të politikës ushtarake të Ukrainës. Duke iu referuar doktrinën së miratuar, zgjidhja e konfliktit përfshin, “eliminimin e grupeve të armatosura ilegale dhe rivendosjen e kontrollit të Ukrainës në kufirin me Rusinë.”
Ukraina, e bashkë me të dhe vendet perëndimore, e kanë akuzuar Rusinë për mbështetje të separatistëve në lindje të Ukrainës, gjë të cilën autoritetet e Moskës e kanë mohuar në vijimësi.
Vetë Rusia gjithashtu paraqiti në dhjetor të vitit të shkuar një doktrinë të re ushtarake, që e përcaktonte zgjerimin e NATO-s si një rrezik të madh të jashtëm. /tesheshi.com/
