Mungesa e të ardhurave në buxhet ka shtyrë qeverinë të kryejë një operacion të fuqishëm që pritet të nisë në vitin 2016. Një ‘super-drejtori’ do të përmbledhë së bashku Tatimet dhe Doganat, dhe në krye të këtij organizmi gjigant që mbledh milionat e buxhetit, pritet të jetë as më shumë e as më pak, por ‘super-drejtoresha’ e tatimeve, Briseida Shehaj.
Një burim pranë qeverisë bëri të ditur për tesheshi.com se bëhet fjalë për një projekt të mbështetur nga Bashkimi Europian, i cili ka kohë që elaborohet nga qeveria. Madje një grup ekspertësh shumë të njohur, përfshirë edhe ish ministrin e financave Arben Malaj, kanë gati një vit që po punojnë për implementimin e këtij modeli në Shqipëri.
Siç mësohet nuk do të jetë vetëm Shqipëria, por edhe Kosova që mund të krijojnë një super-drejtori të doganave dhe tatimeve, ku të mbledhin të gjithë të ardhurat buxhetore në një “xhep”.
Ky model konsiston në reduktim taksash, konkretisht nga 22 në 6 dhe në integrim të Kodit Doganor dhe atë Fiskal, si dhe krijimin e një zyre të vetme, që synon thjeshtim procedurash, shkurtim afatesh, trajtim të shpejtë administrativ dhe eliminim e problemeve në mbitarifim.
Fondi Monetar Ndërkombëtar është supervizori i hartimit dhe krijimit të këtij projekti duke marrë përsipër të përpilojë me precizitet të gjitha taksat që do të vilen dhe në masën e duhur.
Rreziku këtu qëndron se mund të jetë e lartë barra e taksave që janë më pak, por me shumë më të madhe parash çka rrezikon sërish të mos e ndalojë evazionin.
Vetë drejtoresha e Tatimeve, Briseida Shehaj, një javë më parë ka qenë në Gjerogji për të marrë eksperiencën e këtij vendi në reformën fiskale.
Në një raport të grupit të ekspertëve drejtuar nga Arben Malaj, theksohet se arsye e suksesit fiskal në Gjeorgji është se ‘autoriteti tatimor ka evoluar në një nga organet më të forta në sektorin publik, pas bashkimit të doganave dhe departamenteve të taksave në një agjenci të vetme qeveritare’.
Prej muajsh kryeministri, Edi Rama ka kontaktuar si këshilltar për ekonominë, ish presidentin gjeorgjian, Mihail Sakashvilli, i cili më pas u emërua nga presidenti ukrainas si guvernator i rajonit të ODesës dhe si pasojë mori edhe nënshtetësinë ukrainase./tesheshi.com/
