Reciprociteti me Serbinë i vendosur para një jave ka filluar që të japë efektet e veta. Edhe pala serbe e ka kuptuar këtë dhe ka rënë numri i maunave që tentojnë që të kalojnë kufirin me Kosovën. Këtë e konfirmon edhe Dogana e Kosovës përmes një njoftimi.
Deri tani Dogana e Kosovës ka refuzuar hyrjen, përkatësisht ka kthyer mbrapa pesë mauna me naftë dhe gaz natyror.
“Dogana e Kosovës është duke e zbatuar në përpikëri vendimin e Ministrisë e Tregtisë dhe industrisë që është marr në konsultimin me Qeverinë e republikës së Kosovës”, thuhet në njoftim.
Vlen të theksohet se pas fillimit të zbatimit të vendimit nga ana e Doganës së Kosovës dhe pas shpërndarjes së informatave që Republika e Kosovës nuk njeh më certifikatën e ADR-së për automjetet si dhe certifikatën e ADR-së për shoferët, të lëshuar nga autoritetet serbe për transportuesit, nuk ka pasur tentime për të realizuar importe në vendin tonë nga ana e transportuesve serb.
“Për informatë, para aplikimit të reciprocitetit gjatë një dite kemi pasur import nga Serbia me një mesatare nga 10 deri në 15 autobote me vajra dhe gazra të ndryshme me vlerë mbi 100 mijë euro, pra deri tani taksat e pa inkasuara shkojnë deri në 500 mijë euro. Dogana është e përkushtuar dhe ka kapacitet e nevojshme për të implementuar të gjitha vendimet e Qeverisë së republikës së Kosovës”, thuhet në njoftimin e doganës.
Në lidhje me masat e ndërmarra nga Kosova, kanë filluar edhe reagimet e para të Qeverisë së Serbisë. Kryeministri serb Aleksandër Vuçiç ka thënë se për këtë çështje do të bisedojë me Bashkimin Evropian, ndërsa ka kërkuar që kjo masë të hiqet nga Qeveria e Kosovës.
Kujtojmë që Kosova edhe në fund të vitit 2011, kishte marrë masa reciproke ndaj Serbisë për shkak të barrierave të mëdha që i bën ky shtet Kosovës, por fatkeqësisht këto masa nuk zgjatën shumë dhe Qeveria e Kosovës u detyrua që të tërhiqet. /tesheshi.com/
