Barrikada në rrugë nga fermerët, tragetet e bllokuar në porte, pensionistët që dalin në rrugë: protestat janë rikthyer në Greqi në atë që shumë druhen se është nisja e një stine të re konfliktuale, më e vështira që Greqia do të njohë edhe pse mban rekord për protestat e dhunshme dhe vitet e gjata të demostratave antiqeveritare.
Nga kufiri greko-bullgar deri në ishullin jugor të Kretës, fermerët janë ngritur për të shprehur zemërimin e tyre ndaj masave të reja shtrënguese të mandatuara nga ndërkombëtarët.
“Eshtë luftë”, thotë Dimitris Vergos, një prodhues misri nga qyteti verior Naoussa. “Nëse politikanët vijojnë të na shtyjnë në zgrip, nëse duan të na dehumanizojnë edhe më shumë se kaq, ne do të vijmë në Athinë dhe do t’i djegim”.
Me retorikën në këto nivele, administrata e radikalëve të majtë të kryeministrit Aleksis Cipras e ka gjetur veten papritmas pas barrikadës. Ajo përballet me një seri demostratash- edhe peshkatarët e rritësit e bagëtive janë bashkuar me protestat kur edhe punonjësit e sektorit publik dhe privat dalin në rrugë – analistët thonë se periudha e “muajit të mjaltit” që Cipras ka shijuar deri tani, ka marrë fund.
Të mërkurën, autokolona me traktorë në Thesali, hambarin e vendit, bllokuan rrugën drejt Tempit, duke ndërprerë qarkullimin në autostradën më të madhe ekonomike në vend. Me qindra të tjerë u rreshtuan në bregdet në Selanik, ndërsa më në veri, policia u detyrua të përdorë gazin lotsjellës ndaj protestuesve duke mbrojtur prej tyre Evangelos Apostolou, ministrin e Bujqësisë në një ndërtesë administrative ndërsa përleshje të ashpra shpërthyen në Komotini.
Në fokus të zemërimit të tyre janë masat e propozuara për pensionet dhe taksimin, më të fundit në një set reformash të imponuara nga marrja e paketës së re të ndihmës financiare verën e kaluar, prej 86 miliardë eurosh.
Për fermerët, drafti i masave është paradhoma e “puthjes së vdekjes”. “Do të ngrihemi në të gjitha frontet”, thonë sindikalistët që paralajmërojnë se deri të premten e kësaj jave, bllokadat në rrugë do të ngrihen në pjesën më të madhe të vendit. “Gjërat janë jashtë kontrollit”, thonë ata, duke shtuar se nuk është vetëm një gjë për të cilën duhet negociuar.
Gjashtë vjet krizë ekonomike kanë bërë që gjithnjë e më shumë grekë të pretendojnë se janë në pikën që nuk mund t’i mbijetojnë qoftë edhe një mase tjetër të vetme shtrënguese. Me një shifër të paprecedent prej 1.2 milionë njerëzish të papunë, më shumë se 25 për qind e popullsisë, njerëzit thonë se ndodhen në prag të falimentimit.
Pensionistëve iu janë shkurtuar të ardhurat 12 herë nga kreditorët ndërkombëtarë, e këtë javë ata janë të vendosur të dalin në rrugë.
Kreditorët argumentojnë se në nivelin 17 për qind të prodhimit të brendshëm, sistemi grek i pensioneve është ndër më të kushtueshmit e Europës dhe në një farë shkalle, edhe gjenerator i mosfunksionimit.
Për fermerët, reformat jo vetëm do të rrisin kontributin e sigurimeve shoqërore, nga 6.5% në 27%, por atyre do t’u dyfishohen taksat nga 13% në 26%, gjë që do t’u shkurtojë tre të katërtat e fitimit vjetor.
Trazirat kanë sjellë rënie të madhe të popullaritetit të Syrizas. Në një sondazh të fundit, në prag të zgjedhjes në krye të konservatorëve të Qiriakos Micotaqis, partia e qendrës së djathtë e opozitës ishte në krye me katër pikë përqindjeje.
Pothuajse një vit pasi erdhën në pushtet, duke dërguar të dridhura në një gjithë mjedisin konservator të Europës, majtistët grekë kanë ardhur në pikën që të gjithë qeveritë e mëparshme e kanë përballur: vështirësinë për të mbajtur vendin larg falimentimit, duke marrë edhe koston politike kur ia kanë arritur kësaj.
Me ardhjen e Micotaqis në krye të Demokracisë së Re, edhe skena politike është e trazuar dhe pasiguria është rikthyer në Athinë.
Majtistët në pushtet, prej kohësh kanë përjetuar rënie të shumicës parlamentare, dhe votat për të kaluar reforma të vështira nuk janë të sigurta.
Përgatiti: Juli Prifti – /tesheshi.com/
