Nga Mensur Krasniqi
Me brohoritje “Ta mbrojmë Kushtetutën nga Gjykata Kushtetuese”, “Dorëheqje”, “Shtet partiak”, “Banditë”, “Shtet mafiozësh”, të hënën, qytetarë të Shkupit protestuan para objektit të Gjykatës Kushtetuese në Shkup.
Ata nga kjo gjykatë kanë kërkuar tërheqjen e vendimit që presidenti të ketë të drejtën për t’i amnistuar manipuluesit e zgjedhjeve.
Në shenjë proteste qytetarët kanë gjuajtur me letra tualeti drejt godinës së Gjykatës, kështu duke demonstruar mendimin e tyre për vlerën e vendimeve të Gjykatës Kushtetuese.
Në këtë protestë i pari mori fjalën ish-guvernatori dhe ministri i Ekonomisë, Petar Goshev. Sipas tij, Gjykata Kushtetuese tashmë ka humbur kredibilitetin e saj dhe është shndërruar në shoqatë kriminale. Andaj duhet të mblidhen në masë edhe më të madhë kundër “xhelatëve” të Kushtetutës.
“Kjo nuk është Gjykata Kushtetuese, kjo është një degë e shoqatës kriminale, këto janë xhelatët e drejtësisë. Të merret kështu vendimi në një kohë kur është e qartë se me falisifikim e mbajnë pushtetin, kjo është një turp i vërtetë.
Unë mendoj se shumë njerëz duhet të protestojnë, për të mbledhur dhe për të të treguar këtyre të poshtërve se në Maqedoni nuk mund në këtë mënyrë të menaxhohet. Nuk mund gënjeshtra të përditshme, me nxitje të konflikteve ndëretnike të pushtetut. Ato prishen themelet e Republikës së Maqedonisë’, tha Goshev në protestë para Gjykatës Kushtetuese.
Masës së protestuesve me fjalim iu drejtua edhe aktivisti për të drejtat e njeriut nga platforma qytetare “Hajde”, Xharko Trajanovski. Sipas tij, Gjykata Kushtetuese e ndikuar nga pushteti aktual ka sjellur vendim politik për t’i amnistuar kriminelët që bëjnë manipulimin e zgjedhjeve.
“Protestoj sepse jam qytetar dhe jam i obliguar ta ndalojë padrejtësinë. Gjykata Kushtetuese duhet ta mbrojë ndarjen e pushtetit dhe jo ta thyej me shpejtësinë e dritës. Gjithë kjo po ndodh sepse shoqëria kriminele po ngutet të sigurojë amnisti. Duan të sigurojnë amnisti për ata që falsifikuan letërnjoftime, që kanë penguar qytetarë të votojnë, që kanë organizuar edhe njerëzit e vdekur, që kanë blerë vota me paratë tona”, theksoi Xharko Trajanovski.
Të rikujtojmë se Gjykata Kushtetuese javën e kaluar ka pranuar vendimin për ndryshimin e Ligjit për amnisti, me çka përsëri i jepet të drejtë presidentit të shtetit të amnistojë persona të dënuar për parregullsi zgjedhore. Iniciativa është votuar me shumicë të ngushtë prej pesë votave “pro” dhe katër “kundër”.
Që nga viti 2009 presidentit të shtetit në Maqedoni iu hoq e drejta dhe ingerenca të amnistojë persona të cilat do të dënohen për parregullsi zgjedhore.
Ndërsa për parregullsi zgjedhore, së fundi nga ana e prokurores speciale në Maqedoni akuzohen zyrtarë të lartë të pushtetit VMRO-BDI. /tesheshi.com/
