Nga Mensur Krasniqi
“Mbi 90 mijë shqiptarë janë shpërngulur nga Maqedonia”. Ky është titulli i një artikulli të gazetës maqedonase, Dnevnik. Sipas kësaj gazete, kjo shifër vjen në burime të KSHZ, e cila në prag të zgjedhjeve të parakohshme parlamentare ka nisur verifikimin dhe kryqëzimin e të dhënave të MPB-së me të dhënat e institucioneve tjera.
Pra bëhet fjalë për 100 mijë banorë, prej të cilëve siç thuhet 90 mijë janë shqiptarë. Mirëpo ajo çka habit është fakti se nuk dihet tendenca e shkrimit të kësaj gazete për ta problematizuar numrin e elektoratit shqiptar në Maqedoni, e aq më shumë duke pasur parasysh faktin se kjo e dhënë nuk është sqaruar në detaje se për cilën periudhë vlen kjo “shpërngulje e shqiptarëve”.
Për profesorin universitar, sociologun Ali Pajaziti të dhënat e publikuara nga gazeta Dnevnik më shumë janë spektakolare se sa serioze, duke dashur ta tërheqin vëmendjen nga skandalet e fundit politike në Maqedoni, dhe se maqedonasit janë ato të cilët braktisin vendin e jo shqiptarët.
“Këto janë të dhëna të pakonfirmuara, spektakolare, për të tërhequr vëmendjen nga kriza e teokratizimit dhe kryqërimit të hapësirës publike. Një numër i madh edhe nga radhët e maqedonasve janë shpërngulur për të mos u kthyer kurrë në Maqedoni. Australia, Kanadaja…. janë shembuj tipike. 170 vendbanime të zbrazura ka në Maqedoni prej të cilave mbi 90 janë në Maqedoninë Lindore ose në zonat e banuara me naqedonas”, ka deklaruar për portalin tesheshi.com, Ali Pajaziti.
Është e vërtetë që gjendja në Maqedoni është dëshpëruese, dhe se nuk janë të pakët shqiptarët që nuk e kanë fort me dëshirë të jetojnë aty, sië është rasti i një student në Turqi.
“Jam 19-vjeçar dhe jam në studime në Turqi. Këtu nuk më mungon asgjë, nuk paguaj as studimet dhe as konviktin ku banoj. Përveç tjerash universiteti ku studioj neve të ardhurve në këtë vend na siguron edhe punë part-time(gjysmë orari). Nëse edhe më tutje nuk përmirësohet gjendja politike, sociale, ekonomike në Maqedoni, unë nuk shoh arsye për tu kthyer atje. Nuk ka perspektivë, nuk të çmojnë fare, e them këtë se kam kushëri dhe miq që kanë mbarruar studimet dhe kanë mbetur pa angazhim profesional, ose edhe më keq pa punë fare”, deklaroi për tesheshi.com, një student shqiptar.
Por të tilla raste, nuk shërbejnë si argument se vërtet shqiptarët po pakësohen në masë në Maqedoni, edhe pse largimi është një fenomen disacjeëar.
Sepse rikujtojmë se Enti Shtetëror për Statistikë dëshmon të kundërtën. Sipas ESHS-së nataliteti te shqiptarët në Maqedoni është në rritje të vazhdueshme dhe vetëm në pesë vitet e fundit lindjet janë shtuar për 3.3 për qind. Këto përmasa demografike si duket kanë shqetësuar komunitetin maqedonas, i cili në vitet e fundit ka një rënie të theksuar të lindjeve. /tesheshi.com/
