Pasi turma të rinjsh e adoleshentësh lanë pas djegie e shkatërrime të selisë rozë në Shkodër, kryebashkiakja Voltana Ademi nxitoi në Prokurori të ngrinte akuzë kundër Policisë se përse nuk kishte reaguar ndaj dhunës – një precedent i paparë ky – por vetë ajo do hetohet për ngjarjen në fjalë, duke u proceduar penalisht, siç thuhet në një komunikatë policore.
“Më datë 12.12.2020, rreth orës 11:00, në qendër të qytetit të Shkodrës është organizuar një tubim i paligjshëm. Gjatë marshimit një grup të miturish kanë thyer disa banderola në sheshin ‘Nënë Tereza’ dhe kanë tentuar të kryejnë veprime të dhunshme, por janë penguar nga punonjësit e Policisë. Nga sendet e forta dhe lëndët piroteknike të përdorura nga këta persona është dëmtuar një punonjës policie.
Më pas, pjesmarrësit në tubim janë shpërndarë në disa grupe dhe drejtime të ndryshme. Një grup personash është drejtuar te selia e një subjekti politik. Disa persona të mitur kanë ushtuar veprime të dhunshme duke thyer e shkatërruar xhamat e dyert dhe më pas kanë nxjerrë dhe djegur orenditë që ndodheshin brenda godinës.
Specialistët për Hetimin e Krimeve, në bazë të pamjeve filmike, kanë proceduar penalisht 17 minorenë, për veprat penale ‘Shkatërrimi i pronës me zjarr’, ‘Organizimi dhe pjesëmarrja në grumbullime e manifestime të paligjshme’ dhe ‘Prishja e qetësisë publike’.
Gjithashtu janë proceduar si organizatorë të kësaj proteste, për veprën penale ‘Organizimi dhe pjesëmarrja në grumbullime e manifestime të paligjshme shtetasit V. A.(Voltana Ademi), A. S., A. Q., Z. Gj., S. H. , N. M., L. M. dhe I. Q.
Njëkohësisht janë proceduar për veprën penale “Organizimi dhe pjesëmarrja në grumbullime e manifestime të paligjshme” edhe 21 shtetas të tjerë.
Po në vijim të veprimeve janë proceduar penalisht për ‘Shpërdorim detyre’, dy punonjës të repartit zjarrfikës, shtetasit T. M. dhe R. B., të cilët ishin në shërbim dhe kanë reaguar me vonesë pas njoftimit të bërë nga Salla Operative për të ndërhyrë në shuarjen e zjarrit para godinës së një subkjeti politik”, thuhet në deklaratë.
Zonja Ademi reagoi duke e konsideruar të padrejtë këtë procedim.
“Unë kam qenë dhe kam lëvizur me qytetarët e Shkodrës nga posta tek sheshi ‘2 prilli’. Çdo anatemim që bëhet në adresën time është e padenjë…Detyrat e policisë së shtetit është të mbrojë institucionet dhe qytetarët, një kërkesë jo vetëm e imja por e të gjithë personave që kanë denoncuar dhunën e ushtruar pas marshimit paqësor duhet të kishin një reagim legjitim”, tha kryebashkiakja e Shkodrës. /tesheshi.com/
