Turqia të shtunën paralajmëroi qytetarët e saj për rrezikun e “sulmeve të mundshme islamofobike, ksenofobike dhe raciste” në Shtetet e Bashkuara dhe Evropë, pasi aleatët e saj perëndimorë paralajmëruan qytetarët e tyre në Turqi për sulme të mundshme terroriste.
Në dy këshilla të veçanta udhëtimi, Ministria e Jashtme e Turqisë këshilloi qytetarët e saj në Shtetet e Bashkuara dhe vendet evropiane që “të veprojnë me qetësi përballë ngacmimeve dhe sulmeve të mundshme ksenofobike dhe raciste” dhe “të qëndrojnë larg zonave ku protestat mund të intensifikohen”.
Rritja e fundit e “veprimeve anti-islamike dhe raciste” pasqyron dimensionet e rrezikshme të intolerancës fetare dhe urrejtjes në Evropë, thotë Ministria e Jashtme turke.
Disa ambasada në Ankara, përfshirë ato të Shteteve të Bashkuara, Gjermanisë, Francës dhe Italisë, lëshuan të premten një paralajmërim për qytetarët e tyre në Turqi, duke u kërkuar atyre që të jenë vigjilentë ndaj rrezikut të “sulmeve të mundshme hakmarrëse nga terroristët kundër vendeve të adhurimit”.
Ky zhvillim ndodhi pas incidenteve të fundit të djegies së kopjeve të Kuranit në Evropë.
Ministria e Jashtme e Suedisë këshilloi gjithashtu qytetarët e saj në Turqi të shtunën që të shmangin turmat dhe demonstratat.
Një politikan i ekstremit të djathtë dhe kundërshtar i imigracionit dogji një kopje të Kur’anit javën e kaluar pranë ambasadës turke në Stokholm, duke rritur tensionet midis Turqisë dhe Suedisë. Akte të ngjashme të djegies së kopjeve të Kur’anit në Holandë dhe Danimarkë tërhoqën gjithashtu një dënim të fortë nga Ankaraja. /tesheshi.com/
