Nga Mensur Krasniqi
Dikur Tanusha e sot Tearca, janë ato prej së cilave varet fati i të ardhmes së Maqedonisë, si në rrafshin nacional ashtu dhe në atë politik. Që të dyja fshatra shqiptare, por ku Tearca është njëherësh dhe komunë.
Tearca shtrihet nën këmbët e Sharrit, në të djathtë të aksit rrugor nga Jazhinca, kufiri me Kosovën, e deri në Tetovë. Shumicën e banorëve e përbëjnë shqiptarët, gati me 70 përdind, ndërsa pjesa tjetër janë turq dhe maqedonas.
Është një komunë e bashkëjetesës model mes tre etnive, kurrë i njohur për ndonjë incident apo trazirë.
Por tani aty janë kthyer sytë nga të gjithë, edhe nga ndërkombëtarët, të cilët kanë tashmë një barrë plus për t’i bërë derman krizës maqedonase, që, edhe pas zgjedhjeve të 11 dhjetorit nuk po ka zgjidhje. Kjo, për shkak të rezultatit të ngushtë, mes të ashtëquajturve fitues dhe humbës, pasi askush nga palët nuk mund të konsiderohet i tillë në kuptimin e plotë të fjalës. Fituesit dhe humbësit janë thjesht aritmetikë, që për pak gjë mund t’i ndryshojnë pozitat.
Ja, është Tearca, ku ripërsëritja e votimit, siç është vendosur nga Gjykata Administrative, mund të përmbysë gjithçka. Pikërisht kësaj i është trembur VMRO-ja e Gruevksit, që ka vendosur të bojkotojë.
Që pas vendimit të gjykatës në fjalë, të mërkurën shkeli aty i pari zyrtar partiak, deputeti i sapozgjedhur dhe anëtar i kryesisë qendrore në LSDM, Petre Shilegov. Ai tha se Tearca ka nderin që të vulosë fitoren e Maqedonisë demokratike dhe qytetare.
“Maqedonia veçon fitoren mbi regjimin. Mbi 600 000 qytetarë të Maqedonisë zgjodhën bashkëjetesën, përkundër politikave të ndarjes me të cilat qeveriste regjimi i Nikolla Gruevskit. Në Maqedoni e kthyem jetën. Tearca do ta ketë atë nder ta vulosë fitoren e Maqedonisë qytetare e demokratike. Banorët e Tearcës, si gjithë qytetarët e gjithë Maqedonisë, po zgjedhin një Maqedoni evropiane. Edhe këtu në Tearcë qytetarët meritojnë të kenë ujësjellës dhe kanalizim ashtu si gjithkund në botën bashkëkohore të shekullit të 21”, deklaroi Shilegov.
714 votat në vendvotimin 2011 në Tearcë do të jenë vendimtare për qeverinë e ardhshme në rivotimet që do të mbahen më 25 dhjetor. Sipas rezultateve të 11 dhjetorit, në këtë vendvotim kanë votuar 404 veta, ku 91 vota i ka marrë VMRO-DPMNE, 86 LSDM; BESA 65, PDSH 64, BDI 58 dhe Aleanca për Shqiptarët 25 vota.
Diferenca në tërë njësinë 6 mes VMRO-DPMNE dhe LSDM është 307 vota. Por rivotimi në Tearcë pritet ta ndryshojë rezultatin, atë të datës 11 ku në njësinë 6 VMRO-ja mori 4 deputetë, ndërsa LSDM 3 sosh. Dhe ajo që mund të ndodhë më 25 dhjetor është kalimi i një mandati nga Gruevksi tek Zaevi, dhe më pas gjithçka barazohet me numër mandatesh, që do të thotë pamundësi e “fituesve” për të qeverisur.
Pra, sërish gjithçka do varet nga një votë shqiptare, një tregues adekuat ky për gjithë ata zëra nacionalistë maqedonas që duan ta zhbëjnë faktorin shqiptar në ekzistencën e këtij shteti dhe shoqërie.
Tearca përcolli dhe një tregues tjetër këto zgjedhje, ku edhe pse udhëhiqet si komunë nga BDI, e që për më tepër ka votuar në vite për partinë e Ali Ahmetit, më 11 dhjetor e prishi këtë pakt duke kaluar gati 50 përqind tek BESA. /tesheshi.com/
