Presidenti amerikan Donald Trump u ka thënë amerikanëve që të përgatiten për një numër të madh jetëhumbjesh nga infeksioni koronavirus në ditët e ardhshme, ndërsa vendi po përballet me dy javët më të këqija të pandemisë.
“Do të ketë shumë vdekje”, u tha Trump gazetarëve në lidhje me pandeminë.
Ai hodhi poshtë kritikat që administrata e tij nuk kishte bërë sa duhet për të blerë respiratorët e nevojshëm për shumë pacientë me sëmundje të rëndë, duke deklaruar se disa guvernatorë të shtetit kërkonin më shumë të tillë sesa do të duheshin.
“Frika nga mungesa ka çuar në inflacion pretendimesh,” tha Trump, duke komentuar kërkesat që i janë bërë administratës së tij për të siguruar pajisje mjekësore nga furnizimet strategjike kombëtare.
“Ne po i afrohemi një kohe që do të jetë e tmerrshme”
SHBA ka numrin më të madh të të infektuarve në botë, me më shumë se 306,000 të tillë dhe mbi 8,300 të shuar.
Ekspertët mjekësorë të Shtëpisë së Bardhë parashikojnë se midis 100,000 dhe 240,000 njerëz do të humbin jetën në këtë pandemi.
“Ne po i afrohemi një kohe që do të jetë e tmerrshme,” tha Trump Shtëpisë së Bardhë. “Mund të mos kemi parë kurrë shifra të tilla deri më sot. Ndoshta gjatë Luftës së Parë Botërore ose Luftës së Dytë Botërore,” tha presidenti amerikan. /tesheshi.com/
