Andin Hoti, djali i veprimtarit të çështjes kombëtare Ukshin Hoti ka thënë se deri në zbardhjen e fatit të babait të tij nuk do të ndalet. Ai ka kërkuar që kjo çështje të jetë në axhendën zyrtare të bisedimeve në Bruksel.
Ai ka shkruar në Facebook se liria nuk është e plotë pa zbardhjen e fatit të Ukshin Hotit.
“17 vite në kërkim për ty!
Ndoshta dikush edhe pret që ne ti humbim shpresat, por JO asnjëherë!
Deri në zbardhjen e fatit tënd, nuk do të reshtemi së kërkuari dhe për ne do të jesh i gjallë gjithmonë!
Sepse liria nuk është e plotë, sepse Republika, për të cilën dhe gjithçka është e mangët pa zgjidhjen e fatit tënd”, – shkruan Andini në Facebook.
Ai shton se institucionet në Kosovë dhe Shqipëri duhet ta ndjejnë së paku si obligim moral zgjidhjen e misterit për fatin e të atit dhe se është koha e fundit kur Kosova duhet të ngrejë zërin në kërkim të tij.
“E ripërsëris, kërkojmë që çështja e pazgjidhur e Ukshin Hotit të futet në agjendë zyrtare gjatë bisedimeve me Serbinë dhe të trajtohet me seriozitet të plotë”, – përfundon shkrimin e tij djali i Ukshin Hotit. /tesheshi.com/
