Fotografia është kopjuar dhe postuar pa fund, duke u bërë e njohur në internet si “Fëmija skeptik i Botës së Tretë”. Por, bashkë me imazhin dhe komentet satirike në rrjetet sociale, ka shpërthyer edhe debati për mënyrën sesi bota perëndimore e sheh dhe e raporton varfërinë dhe gjendjen e fëmijëve afrikanë.
Djali në fotografi ka veshur rroba të ndotura dhe në fytyrë ka një shprehje ironike, që ngjan e çuditshme për një fëmijë aq të vogël, por që është fiksuar në imazh ndërsa djali rrotullonte sytë nga të gjitha anët ndërsa gruaja e ulur pranë tij në tokë, i flet.
Ky imazh u postua në faqen Reddit tre vjet më parë, nga një person në Teksas që e kishte pikasur fotografinë në faqen e Facebook-ut të një miku të tij. Që prej asaj kohe, ajo është kopjuar dhe përdorur me humor një numër të pafund herësh. Shumë nga citimet që i janë vënë përsipër fotografisë luajnë me stereotipet e Afrikës si një kontinent i përfshirë nga lufta, të varfër dhe që vuan vazhdimisht nga mungesa e ushqimit.
Kështu, pra, po më thua që pastruesi i minave në vendin tënd është një lojë?
Ti ke humbur peshë me qëllim?
Por, kush është djali në fotografi. BBC në një artikull kushtuar fotos, thotë se nuk ka arritur të lokalizojë djalin e vogël e familjen e tij, që ndoshta as nuk e dinë se janë shndërruar në një sensacion në internet.
Gazetarët kanë arritur të gjejnë gruan në fotografi. Ajo është 28-vjeçarja Heena Pranav, një doktoreshë që jeton në Çikago. Në vitin 2012, ajo kishte udhëtuar në Gulu, një qytet në veri të Ugandës për të punuar për një projekt në ndihmë të grave të traumatizuara nga dhuna e Ushtrisë së Lordëve.
Fëmija në fotografi nuk ka lidhje me këtë projekt. Sipas Pranav, ajo e takoi atë në një treg lokal e hamendëson se ai duhej të ishte dy apo tre vjeç.
“Isha me një grup studentësh të mjekësisë, ne po shëtisnim dhe pashë këtë djalë të vogël, që m’u duk vërtet shumë i ëmbël”, tregon ajo.
“Nëna e tij ishte duke punuar aty pranë në treg. Iu afrova për të luajtur me të, ishte një fëmijë shumë i gjallë”, shton Pranav.
Djali nuk fliste anglisht, por takimi i tyre u filmua me kamera nga njëri prej studentëve të grupit. Pranav thotë se as ka dëgjuar për Reddit përpara se një miku i saj të postonte fotografinë në të dhe ajo të bënte xhiron e botës.
“Nuk e imagjinoja se kjo mund të ndodhte kështu”, thotë ajo. “Do doja që nëna e djalit ta dinte këtë dhe të përfitonte në një farë mënyre prej kësaj fotografie, pasi mendoj se në gjithë këtë proces, djali është shfrytëzuar”, thotë Pranav.
Kjo pikëpamje mbështetet edhe nga të tjerë, që punojnë në këtë fushë.
“Eshtë e vështirë që të bëjmë si policë të moralit dhe të themi se fotografia nuk është për të qeshur, por njerëzit duhet të mendojnë më shumë për postimet që ndajnë në rrjetet sociale”, thotë shefja e një organizate të fëmijëve. Sipas saj, askush nuk do të donte që fëmija i vet të bëhej objekt humori në të gjithë botën. “Por, pavëmendja jonë ndaj këtij fakti sjell të plotë diferencën sesi ne mendojmë për “ne” dhe “ata”, shton ajo.
Fotografia është shfrytëzuar nga të tjerë edhe për çështje që nuk kanë lidhje fare me djalin. Afrikanët e kanë përdorur për të kritikuar idetë perëndimore për kontinentin e tyre. Disa e kanë përdorur për t’u tallur me mbulimin e medias për vendet e varfëra me batuta të tilla si: Unë vetëm sa qaj përpara kamerës, dhe fshati im merr një shkollë të re.
Misionarët e krishterë janë vendosur në shënjestër nga “shakatorët” online: këpucë të reja ndërsa unë vendos Jezusin në zemrën time?
Fotografia e bëri xhiron e fundit në internet, në Afrikën e Jugut e përdorur nga studentët gjatë protestave kundër tarifave universitare: le të flasim për arsimin falas tani.
“Eshtë e rrezikshme të tregosh një histori të vetme për kontinentin afrikan, por edhe për zhvillimin në përgjithësi”, thonë ekspertët. “Media jonë formëson botën në bazë ditore, por zhvillimet pozitive ndodhin me kalimin e kohës, dhe nuk janë edhe aq interesante sa të shkruash për krizat e luftën. Vetëm kur dëgjon për Afrikën, urinë e saj, luftërat, sëmundjet, HIV-in, duket se tema të tilla janë jashtë rrethit të interesave”.
Përgatiti Juli Prifti – /tesheshi.com/
