Katër vjet pas martesës me Wissam Al Mana, një biznesmen musliman nga Katari, Janet Jackson lindi të martën, me 3 janar, një djalë të shëndetshëm, të cilit ia vendosën emrin Isa.
“Janet kishte një lindje të shëndetshme, pa ndonjë komplikim”, thuhet në një deklaratë të lëshuar nga publicisti i saj, njofton BBC.
Ky i fundit shtoi se çifti ndihej i emocionuar nga ardhja në jetë e foshnjës, djalë, emri i të cilit do jetë Isa (duke iu referuar versionit islam për Jezuin).
Pak muaj më parë, Jackson u pa në një rrugë të Londrës duke blerë gjëra për fëmijën në pritje, e veshur sipas normave dhe etikës islame.
Fotot u shpërndanë shpejt në internet, ndërkohë që shumë komentues e panë këtë si një konvertim të saj në Islam. Spekulimet u rritën edhe më shumë kur Jackson në postimin e saj të fundit shkroi fjalën Elhamdulilah, që në gjuhën arabe do të thotë “Falenderimi i takon Allahut”. /tesheshi.com/
