Denion Meidani, djali i ish-Presidentit Rexhep Meidani, për të cilin u përfol si kryeministër i një qeverie teknike, deklaron se Ilir Meta do të zëvendësojë Saimir tahirin në postin e Ministrit të Brendshëm.
Në një postim në FB pas disa takimeve të babait të tij me kreun e LSI-në, Denioni ka një parashikim që duket si deduksion politik.
Ai thotë se Ilir Meta në një intervistë një ditë më parë vetëm sa nuk tha se vetëofrohej ministër i Brendshëm ose kryeministër.
Postimi
“E kemi thënë dhe stërthënë, që qeveria kërkon jo impulse të reja, por riformatim total.
Nëse riformatimi duhet patjetër të jetë brenda mureve të këtij koalicioni për të respektuar marrveshjen e 1 Prillit, atëherë e vetmja gjë, që kryetari i LSI, Z. Meta la pa thënë dje në intervistën e tij, (por që duhet ta kishte thënë) ishte se ai vetë ofrohej për postin e kryeministrit dhe ministrit të brendshëm.
E them këtë, sepse në gjendjen tragjike, që është vendi, ministria dhe policia, ministri i brendshëm duhet të jetë një person nga rradhët e të parëve të koalicionit, i cili duhet të jetë i veshur me eksperience, energji, forcë karakteri, vullnet të hekurt, vendosmëri dhe guxim të jashtzakonshëm për tu përballur me kartelet e drogës që kanë mbirë, si kërpurdhat pas shiut në të gjithë territorin e vendit.
Pozicioni i kryeministrit do ishte i nevojshëm për shumë arsye, por në këtë rast do veçoja faktin që kryeministri aktual dhe partia e tij kanë treguar në rastin më të mirë pafuqi e deri në përfshirje në lumin e drogës, nëse besojmë akuzat pafund.
Për më tepër çdo ministër i brendshëm sado i pushtetshëm do ishte përsëri i pafuqishëm pa patur nën kontroll Drejtorin e Përgjithshëm të Policisë së Shtetit që është një nomenklaturë e kryeministrit dhe është ky drejtor, që emëron direkt gjithë piramidën e policisë, nga maja në bazë.
Sigurisht edhe nëse zoti Meta e ka menduar këtë zgjidhje, apo zgjedhje besoj llogaritjet janë momentalisht akoma të paqëndrueshme.
Opozita për herë të parë në këto tre vjet duket e qartë, me rradhë të shtrënguara dhe e vendosur në zgjidhjet, që ofron e zgjedhjet që kerkon.
Presim të qartësohet pozicioni i zotit Blushi dhe faktorëve të tjerë në Partinë Socialiste, që nuk janë pjesë e Rilindjes dhe që kanë shprehur me zë, apo nën zë revoltën për keqqeverisjen dhe kanabizimin e vendit, por që akoma hezitojnë të bashkojnë rradhët në një front kundër të keqes për të mirën e vendit dhe në funksion të integrimit euro-atlantik.
Presim gjithashtu të qartësohet pozicioni i PDIU-së, kur kemi lexuar në media, që brenda kësaj force politike kemi faktorë afër kryeministrit, që po sfidojnë kryetarin e tyre dhe po bëjnë allishverishe për përfaqesime e përfitime personale në kurriz të vendit, që besoj do kenë kosto për sa i përket elektoratit të saj.
Presim atëherë një shtator të mbushur me zhvillime, ndryshime e lëvizje në konfigurimin parlamentar e influencat politike”.
/tesheshi.com/
