Ardian Hoxha, djali i Remzi Hoxhës, i cili është zhdukur 20 vjet më parë në rrethana të dyshimta, ku sipas drejtësisë shqiptare janë involvuar zyrtarë të shërbimit sekret që drejtohej nga Bashkim Gazidede, deklaroi në një intervistë për gazetën “Dita” se nëse impenjohet Kryeministri Edi Rama, për një kohë të shkurtër sillet në Shqipëri njeriu kyç i çështjes, Ilir Kumbaro, i cili sipas Hoxhës, ka dijeni për vendin ku ndodhen eshtrat e të ndjerit Remzi Hoxha.
I biri i veprimtarit të rezistencës së shqiptarëve kundër makinës së Millosheviçit, deklaron se ashtu siç gjeti për 24 orë vrasësit e oficerit të RENEA-s dhe vrasësin e turistëve çekë, Edi Rama mund të arrijë për 7 ditë të sjellë në Shqipëri Ilir Kumbaron.
Ish-oficeri i shërbimit sekret është dënuar nga gjykatat shqiptare si fajtor në rrëmbimin e Remzi Hoxhës. Por ai ndërsa ishte në “liri me kusht” në Britaninë e Madhe, arriti të arratisej disa vjet më parë dhe për atë nuk ka asnjë gjurmë.
Ardian Hoxha thekson se Ilir Kumbaro është mbrojtur nga avokatë të paguar nga ish-Kryeministri Sali Berisha, të cilin e konsideron fajtor në zhdukjen e të atit.
I biri i Remzi Hoxhës po organizon një fushatë për mbledhjen e firmave për të arritur gjetjen e fajtorëve të aktit barbar.
Në intervistën për gazetën “Dita”, Hoxha, thekson se nuk po pritet nga Kryeministri Rama, ndërkohë që ka dy javë që ka komunikuar me këshilltarin e tij Endri Fuga.
Hoxha, ka potencuar faktin se i ati i tij është zhdukur pasi ishte dëshmitarë i dy takimeve dramatike: i Berishës me zyrtarë të lartë serbë dhe takimit të Bashkim Gazidedes me Arkanin e tmerrshëm.
I pyetur a synon familja e tij që të dënohet Sali Berisha, Ardian Hoxha përgjigjet: “ne si familje nuk na intereson kjo. Ne na intereson vetëm eshtrat t’i gjejmë, t’ia bëjmë babait tim një varr dhe të vazhdojmë me jetën tone”.
/tesheshi.com/
