Ministri i Jashtëm, Ditmir Bushati, ka reaguar pas fjalës së kreut demokrat Lulzim Basha, në seancën e debatit mbi qeverinë dhe programin e saj.
Basha tha në fjalën e tij se prioritet i qeverisë Rama në 4 vitet e para të mandatit të saj ishin marrëdhëniet me Serbinë, ndërkohë që nuk ka pasur asnjë kontakt me Greqinë, ndërsa me Italinë marrëdhëniet kanë arritur në një pikë që s´kanë kuptim.
Por, Bushati e krahasoi deklaratën e Bashës me fjalimet në mitingjet elektorale.
“Sot mu duk sikur ishte mitingu përmbyllës i fushatës në 25 qershor. Kujtoj një shkodran që më argumentoi se do votonte PS këto zgjedhje. Duket sikur ngatërron muzikën live me shiritin e megafonit, është fatkeqësi. Nuk është çështje shiriti, por opozita drejtohet nga një person bosht i boshllëkut”, tha Bushati.
Në vijim ai shtoi se Basha i dukej më i vetmuari, se edhe nga ata njerëz nga PD që kanë vendosur tulla në proçesin demokratik, zotëria vendosi ti përjashtojë nga jeta politike.
“Mesazhi i 25 qershorit ishte i qartë. Shqiptarët mbështetën e votë PS për ato që duam të bëjmë ne.
Është luks qe të kesh një opozitë parlamentare që të mos dijë çfarë është karta e Atlantikut. Ju ftoj që të bëjmë një debat në kushtet e një vendi kandidat për në BE dhe jo hartimesh që bënit ju kur ishit te “Sami Frashëri”. Me fjalën rajon për këtë qeveri kuptohet hapësira imdediate që kufizohet me Greqinë, Italinë, Turqinë dhe Serbinë”, tha Bushati. /tesheshi.com/
