Ministri për Europën dhe Punët e Jashtme, Ditmir Bushati, paralajmëroi nga SHBA, ku po merr pjesë në Asamblenë e Përgjithshme të OKB-së, bashkë me kryeministrin Edi Rama, se në mars të 2018-ës, do të ketë një takim të BE me vendet që janë pjesë e proçesit të integrimit.
“Po punohet për të pasur rezultate në luftën kundër krimit e drogës. Në mars do ketë takim të BE me të gjitha vendet që janë pjesë e proçesit të zgjerimit, ne synojmë që në harkun kohor të kësaj periudhe, të kemi disa hapa konkretë në këtë drejtim që ti krijojmë mundësi BE të marrë vendimin final për hapjen e proçesit të integrimit. Reforma në drejtësi është kyçe dhe ne po merremi me këtë çështje”, tha Bushati në një intervistë për Zërin e Amerikës.
Duke komentuar marrëdhëniet mes Shqipërisë dhe Greqisë, kreu i diplomacisë tha se vijon puna për çështjet e vjetra, që nuk janë zgjidhur mes dy vendeve.
“Nuk besoj se është në interesin dhe dëshirën e Greqisë për të vendosur kushtëzime për perspektivën europiane të Shqipërisë, por siç u bë e qartë edhe në programin e prezantuar nga kryeministri jemi të interesuar për një marrëdhënie të drejtë me Greqinë dhe që sjell zgjidhje të drejta për të dyja palët.
Katër vitet e shkuara janë bërë disa hapa, atë që e kemi cilësuar si politika me hapa të vegjël, janë bërë hapa konkrete përpara, për marrëveshjen e detit kemi shkëmbyer pikëpamje, të gjitha çështjet janë vendosur në tryezë.
Kemi arritur në një moment përcaktues, ku së bashku me homologun do ti ulim këto çështje në një nivel ekspertësh dhe më pas do ua prezantojmë dhe kryeministrave tanë. Do përçojmë marrëdhëniet mes dy vendeve në një frymë evropiane. Edhe Greqia ka interes për t’u përfshirë në këtë proçes.
Jemi të interesuar për tu kyçur në një marrëdhënie strategjike me Greqinë, marrëdhënie që pasqyron rrymën evropiane. Kemi rënë dakord për një kalendar të qartë aktivitetesh, që do përfshijë edhe pjesën politike, me synim përshpejtimin e rrugëve për një pjesë të mirë të problematikave”, u shpreh Bushati.
Në vijim ai shtoi se Ballkani Perëndimor është në situatën më të stabilizuar, por prapë përballet me sfida.
“Bashkëpunimi rajonal është i domosdoshëm, por nuk mund të konsiderohen si anëtarësimi i Shqipërisë dhe vendeve të tjera në BE.
Zgjerimi i BE me vendet e Ballkanit Perëndimor konsiderohet strategjik edhe vetë për BE. Ne jemi fokusuar dhe kemi pasur bashkëpunim me vendet e Ballkanit në luftën kundër terrorizmit.
BE dhe Ballkani perëndimor duhet të punojnë realisht për të zvogëluar hendeqet”, tha ai. /tesheshi.com/
