Të mërkurën, në Fushë-Mamurras u festua një ditëlindje e rrallë. Bardha Lleshaj patjetër që gjatë jetës duhet të ketë marrë urimin klasik “U bëfsh 100 vjeç!”, sa herë që ka patur ditëlindjen; dhe dje ajo i mbushi të njëqindat.
Ajo mbahet për bukuri dhe për faktin se vetëm dy herë ka përdorur medikamente sa është gjallë.
Sipas saj, shëndetin e ka nga llixhat e frekuentuara shumë, nga ushqimi bio, si dhe nga të qënit gjithnjë aktive.
Bardha është nga fshati Baza i Burrelit dhe është martuar në moshën 18-vjeçare me Bibën e sapoardhur nga ushtria. Më pas jeta e tyre u zhvendos në Kurbin, ku Bardha punoi në kooperativë.
Tashmë ajo jeton me dy djemtë, nuset dhe fëmijët e tyre, të cilët ja bëjnë hyzmetin rregullisht për sa ajo ka nevojë. Ata i festuan dhe ditëlindjen, duke e uruar dhe për njëqind të tjera jetë. /tesheshi.com/
