Ish-presidenti i njëmbëdhjetë i Turqisë, Abdullah Gyl, ka humbur babanë në orët e mbrëmjes të së dielës.
Ahmet Hamdi Gyl ka ndërruar jetë në moshën 91-vjeçare. Prej kohësh nën mbikëqyrjen e mjekëve për shkak të moshës së thyer, ai është dërguar dje në spital, ku me gjithë përpjekjet nuk ka qenë e mundur të mbahet në jetë.
Baba i tre fëmijëve, Ahmet Hamdi Gyl do të përcillet për në botën tjetër dhe në praninë e presidentit Erdogan, i cili e ka ngushëlluar paraardhësin në detyrë përmes telefonit dhe ka konfirmuar pjesëmarrjen në varrim.
Zëdhënësi i presidentit, Ibrahim Kallën, i ka shprehur po ashtu ngushëllimet ish-presidentit Gyl nëpërmjet një postimi në Twitter.
Abdullah Gyl ka mbajtur shumë poste shtetërore gjatë jetës së tij politike, mes të cilëve atë të kryeministrit dhe të ministrit të Jashtëm. Një nga themeluesit e AKP-së, ai do të ishte presidenti i Turqisë mes viteve 2007-2014.
Që prej asaj kohe larg politikës aktive, ai ka mohuar së fundi dhe zërat e nxitur nga figura të opozitës turke se synonte të kandidonte në zgjedhjet presidenciale të 2019-s. Abdullah Gyl ka pohuar në mënyrë të përsëritur se nuk dëshiron të përfshihet aktivisht në politikën e ditës. /tesheshi.com/
