Nga Blendi Gashi
Grevistëve të Fabrikës së Tubave të cilët në muajin maj të këtij viti bëjnë dy vite që kanë gritur tendën para qeverisë, nga sot i janë bashkangjitur edhe aktivistët e opozitës me tenda në shesh.
Protestat ‘ditë e natë’ është beteja e re e tri partive opozitare VV, AAK, NISMA në përpjekje për të detyruar PDK dhe LDK-në të largohen nga pushteti dhe t’i hapin rrugë zgjedhjeve të reja, pasi hedhja e gazit lotsjellës në Kuvend nuk iu kreu punë.
Opozita ka marrë leje nga Komuna e Prishtinës, saktësisht Drejtoria e Shërbime Publike, por jo edhe nga Policia e Kosovës, për të shfrytëzuar në afat të pacaktuar disa hapësira të shesheve ‘Skëndërbeu’ dhe “Ibrahim Rugova”, ku edhe janë ngritur tendat në të cilat do të qëndrojnë siç thuhet ‘ditë e natë’, drejtuesit e partive opozitare dhe përkrahësit e tyre.
Aktivistët e këtyre partive kanë marrë me vete edhe batanije dhe gjëra të tjera të nevojshme.
Rrugën e re që do të ndjek opozita, pikërisht përmes rrugës, e konfirmuan sot vet tre liderët opozitar, Visar Ymeri, Ramush Haradinaj dhe Fatmir Limaj.
“Nga ora 14:00 do të nisim një protestë të përhershme prej 24 orësh në shesh para objektit të Qeverisë dhe Kuvendit”, kanë thënë ata.
Ish lideri i VV-së Albin Kurti ka treguar se sonte do të flejë në shesh, siç ka thënë, “më në fund do të pushoj, pasi jam lodhur me organizimin e protestës së 27 shkurtit”.
“Ne jemi mbledh këtu të qëndrojmë, sot, nesër e pasnesër dhe sa të jetë e nevojshme. Nuk mund të lejojmë që Kosova të jetë as shtet i kapur e as policor. Ne kemi nevojë për një qeverisje demokratike”, ka deklaruar Kurti, i cili iu ka bërë thirrje qytetarëve që t’u bashkohen për ta larguar sa më parë qeverinë.
I pyetur se a kanë marrë leje edhe nga Policia e Kosovës, Kurti ka thënë se sheshi është i qytetarëve dhe kjo bën që të mos ketë nevojë për kërkim të lejes.
“Nëse kërkoj leje nga Policia, atëherë unë s’do të jem më unë”, ka thënë Kurti.
Por, a do të kryejë punë dhe jap rezultat ngritja e tendave dhe “ruajtja” e dyerve të qeverisë “ditë e natë”?
Nëse kihet parasysh protesta e punëtorëve të Fabrikës së Tubave, vështirë mund të thuhet se protestat e tilla mund të sjellin lëvizje në favor të partive opozitare, thonë njohës të rrethanave politike në vend.
Analisti politik, Leon Duhanaj, thotë se opozita kosovare duke qenë se nuk po ofron asnjë alternativë serioze politike, me aksionet e saj vetëm sa po i shërben kastës qeveritare për ta mbajtur pushtetin.
Ai thotë se partitë në opozitë përveç që nuk artikulojnë mendime të qarta politike, ata as nuk japin shembull të respektit ndaj institucioneve dhe ligjeve të vendit.
“Tani, pas disa protestave radhazi dhe pas kauzës gjashtëmujore të mobilizimit total po vërehet çartë se intensiteti i protestave do të shkoj drejtë rënies dhe mbështetja për opozitën do të zbehet në masë të madhe, si rezultat i sjelljeve të tyre të paarsyeshme. Opozitës nuk i mbetet gjë tjetër veçse të organizoj protesta “ditë, natë” duke shfrytëzuar militantet e subjekteve respektive për të bërë tollovi në opinion”, thotë Duhanaj për tesheshi.com.
Njohësi i rrethanave politike në vend, Islam Krasniqi, thotë se duke pasur në mendje punëtorët e Fabrikës së Tubave që protestojnë që një kohë të gjatë para qeverisë, vështirë se qëndrimi i opozitës “ditë e natë” para qeverisë mund të sjell rezultat.
“Një protestë e tillë ka ndodhur në Shqipëri por pa sukses. Opozita e bashkuar duhet të provojë me protesta masive paqësore, sepse protesta e fundit i ka tmerruar kryeministrin dhe zv. e tij, të cilël nga frika e humbjes së pushtetit, helm qitshin nga goja duke ju kërkuar mejdan opozitës dhe protestuesve”, ka thënë Krasniqi për tesheshi.com.
Ai thotë se protestat që do të mbahen në vazhdimësi nga opozita, edhe pse po paralajmërohen të qeta, nuk përjashtohet mundësia që ato të eskalojnë pasi masa është vështirë të kontrollohet.
“Në protestë mund të marrin pjesë edhe anëtarë të pozitës që t’i provokojnë policin apo të përdorin dhunë ndaj institucioneve, vetëm e vetëm ta prishin imazhin e protestës paqësore dhe të dalin para ambasadorëve të thonë që partitë e opozitës me dhunë po mundohen me rrënu shtetin dhe po duan të bëjn revolucion”, thotë Krasniqi.
Ndryshe, në hapësirat përreth objekteve të institucioneve është shtuar numri i forcave policore. Po ashtu policia është vendosur në çdo cep të shesheve të kryeqytetit. /tesheshi.com/
