Teksa Shqipëri është në hapje e sipër, e promovuar dhe si histori suksesi në përballimin e krizës pandemike, referuar treguesve krahasimorë, ka ardhur një ditë e errët, me një viktimë më shumë e me një galop të infektuarisht, 25 në 24 orë. E kjo, pasi tre javësh me vdekje të harruara, e gjithashtu me një rënie drastike të të infektuarve, që shkoi deri në 1 në 24 orë.
Mirela Cami, Drejtore e Operatorit të Shërbimeve të Kujdesit Shëndetësor, ishte ajo që informoi:
“Mëngjesin e sotëm ka ndërruar jetë në mënyrë të papritur, pavarësisht përpjekjeve të mjekëve një pacient 69-vjeçar nga Tirana, me inicialet S.K., i cili po trajtohej në terapi intensive në spitalin infektiv. Ministria e Shëndetësisë i shpreh ngushëllimet familjes së të ndjerit.
Që nga fillimi epidemisë, 33 qytetarë e kanë humbur betejën me Covid19.
Në 24 orët e fundit kemi sërish shtrime të reja në spitalin infektiv, ku aktualisht po trajtohen 17 pacientë, nga të cilët 3 janë në terapi intensive.
Në 24 orët e fundit ka rritje të numrit të të prekurve, të lidhura me kontakte të rasteve të mëparshme pozitive por edhe vatra të reja në Tiranë.
Janë testuar 173 qytetarë si të dyshuar të prekur me Covid19 dhe janë konfirmuar 25 raste pozitive. Më konkretisht janë 24 të prekur në Tiranë dhe 1 në Durrës.
Ndër rastet e reja janë 15 të prekur në një call-center, kontakte të një rasti pozitiv të identifikuar dy ditë më parë.
Po vijon hetimi epidemiologjik edhe për disa raste të reja në Tiranë.
Ne 24 orët e fundit janë shëruar 8 qytetarë”, tha ndër të tjera zyrtarja shëndetësore. /tesheshi.com/
