Arkivi i Shtetit sjell në kujtesë ditën kur nis udhë televizori, si një mjet informimi me zë e figurë.
Si sot më 26 janar 1926 u shpik ‘’televizori’’, shkruan Arkivi, duke vijuar me detaje të tjera:
“Në një ditë si kjo por 97 vjet më parë, John Logie Baird eksperimentoi me versionin e parë të ‘televizorit mekanik’.
Në ekranin që ishte shumë i vogël, u shfaq një kokë njeriu që lëvizte. Ishte koka e Daisy Elizabeth Gandy, bashkëpunëtores së John Logie Baird, shkencëtarit skocez që njihet si shpikësi i televizorit.
Kutia që solli për herë të parë figurat lëvizëse në shtëpitë e njerëzve, në versionin e saj të parë eksperimental ngjante më shumë me radion, vetëm se zëri shoqërohej me figurën, që qartësohej duke rrotulluar një buton për ‘skanim elektronik’”, përfundon infoja e Arkivit të Shtetit mbi mjetin që është bërë njësh me jetën e njeriut.
Kujtojmë se Shqipëria arriti të prodhojë dhe vetë televizorë, në kohën e komunizmit, me URT-në e Durrësit. /tesheshi.com/
