Kryeministri Ramush Haradinaj ka shfrytëzuar Ditën e komunitetit turk në Kosovë, për të përcjellë mesazhe me nëntekst paqtues me Ankaranë. Javë pasi acaroi raportet me autoritetet turke mbas deportimit të 6 gylenistëve, deri sa paralajmërua nga vetë presidenti Erdogan, Haradinaj zgjodhi të jetë i “urtë” në fjalët e tij.
“Shqiptarët dhe turqit në Kosovë nuk ndahen, janë të lidhur, janë bashkë, është dëshmuar në mënyrën më të mirë të jetës tonë, pra s’ka një rast që flet ndryshe. Kosova është vend i vogël, ka plot sfida, ka plot probleme si në ekonomi, si politike, ka punë shumë para vetes, E vetmja mënyrë që me i kry punët është me qenë bashkë, me qenë afër njëri-tjetrit, me ndihmu ecjen e Kosovës dhe nëse ecë Kosova nuk humbim”, tha kryeministri Haradinaj.
Ndërsa ministri i Administratës Publike ardhur nga ky komunitet, Mahir Yagcilar, tha se kjo ditë nuk është vetëm e këtij komuniteti por edhe e Kosovës.
“Ne besojmë që dita e komunitetit turk është edhe dita e Republikës së Kosovës, sepse kjo ditë buron prej pavarësisë së Kosovës. Para 10 viteve kur është shpall pavarësia e Kosovës, edhe unë, edhe deputetët e tjerë, edhe përfaqësuesit e komunitetit turk, me plot dëshirë kemi qenë pjesë e shtet-ndërtimit, deklarimit edhe nënshkrimit të deklaratës së pavarësisë. Dhe në këtë aspekt ne për 10 vjet jemi duke festuar këtë festë me aktivitete të ndryshme kulturore-artistike, sportive, mjedisore, artistike, me publikimin e librave dhe me tryeza të rrumbullakëta sa i përket gjendjes në Kosovë në komunitetin turk dhe gjithashtu marrëdhëniet me shtetet, sidomos me shtetin amë, Republikën e Turqisë”, ka thënë ai, përcjell Kosovapress.
Yagcilar ka përmendur tutje raportin e progresit për të treguar se ka probleme në zbatimin e strategjive dhe rekomandimeve në lidhje me komunitetet.
Kurse kryetari i komunës së Mamushës, Abdulhadi Krasniqi nga Partia Demokratike Turke e Kosovës ka falënderuar institucionet kosovare për mbështetje ndaj këtij komuniteti.
“Zotëri kryeministër! Ne jemi komuniteti turk, ne jemi turk, por na jemi kosovarë, komuniteti turk është komuniteti më i integruar për komunitete në Kosovë, vitet e fundit ne si komunitet e kemi dhënë përkrahjen sipas mundësive që kemi pas, sidomos komuna e Mamushës e dini edhe ju, edhe krejt turqit, edhe krejt shqiptarët e Kosovës e dinë për kontributin e shtet-formimit të Kosovës”, ka thënë ai. /tesheshi.com/
