Kuvendi i Kosovës sot do të mbajë një seancë të jashtëzakonshme, ku pikë e vetme e rendit të ditës do të jetë zgjedhja e qeverisë së re.
I mandatuar për ta udhëhequr qeverinë e ardhshme të Kosovës është lideri i AAK-së, Ramush Haradinaj, partia e të cilit është pjesë e PAN-it me PDK-në dhe NISMA-n, ndërsa në koalicion janë edhe AKR, Lista Serbe dhe partitë tjera të minoriteteve.
Për t’u zgjedhur qeveria, duhet t’i ketë së paku 61 vota të deputetëve.
Seanca është paraparë që të mbahet në orën 16:00, por vështirë se mund të nisë në kohë, meqë deputetët e Listës Serbe do të qëndrojnë në Beograd deri pas orës 14:00.
Përfaqësues të kësaj partie politike do të priten nesër në orën 13:00 nga shefi i Zyrës për Kosovën në qeverinë e Serbisë, Marko Gjuriç.
Siç ka njoftuar zyra e Gjuriçit, ai bashkë me Goran Rakiçin, më pas, në orën 14:00 do të mbajnë një konferencë shtypi në ndërtesën e qeverisë së Serbisë.
Praktikisht, është e pamundur që këta deputetë të mbërrijnë në orën 16:00 për seancën në Prishtinë.
Vota e serbëve është jetike për zgjedhjen e Haradinajt në postin e kryeministrit. /tesheshi.com/
