Presidenti i SHBA Joe Biden nënshkroi 15 urdhëresa ekzekutive menjëherë pasi u betua të mërkurën, duke prishur një seri politikash nga paraardhësi i tij republikan Donald Trump.
Duke nënshkruar urdhëresa ekzekutive, memorandume dhe direktiva para gazetarëve në Zyrën Ovale të mërkurën pasdite, Biden tha se nuk kishte “kohë për të humbur”.
“Disa nga urdhërat ekzekutivë që po nënshkruaj sot do të ndihmojnë në zbutjen e krizës me COVID-19. Ne do të luftojmë ndryshimin e klimës pasi nuk e kemi luftuar deri më tani, ne do të promovojmë barazinë racore dhe do të mbështesim komunitetet në nevojë. Këto janë vetëm pikënisje“, u citua Biden të thoshte nga Reuters.
Këshilltarët e tij thanë se dekretet e nënshkruara nga presidenti i ri përfshijnë veshjen e detyrueshme të maskës në të gjitha institucionet federale dhe për të gjithë punonjësit federalë, krijimin e një zyre të re të Shtëpisë së Bardhë për të koordinuar përgjigjet pandemike, ndalimin e daljes së SHBA nga OBSH, si dhe kthimin në Marrëveshjen e Klimës së Parisit.
Ndër rregulloret që kanë të bëjnë me politikën e imigracionit, Biden revokoi deklaratën e Trump-it që lejonte financimin për ndërtimin e një muri në kufirin me Meksikën dhe i dha fund një ndalimi të udhëtimit në SHBA për disa vende me shumicë muslimane.
Nënshkrimi i sotëm shënon vetëm fillimin e një serie lëvizjesh që Biden do të ndërmarrë së shpejti, i tha shtypit zëdhënësi i tij Psaki.
“Në ditët dhe javët e ardhshme, ne do të fillojmë veprime të reja për të përmbushur sfidat dhe për të përmbushur premtimet që presidenti i ri i ka dhënë popullit amerikan,” tha Psaki.
Biden pritet gjithashtu që së shpejti të shfuqizojë vendimet që ndalojnë personat transgjinorë të shërbejnë në ushtrinë amerikane dhe heqjen e ndalimit të financimit nga SHBA për programet ndërkombëtare të planifikimit familjar në lidhje me abortin. /tesheshi.com/
