Demokratët kanë shfrytëzuar ditën e parë të shkollës për të deklaruar një situatë, sips tyre, katastrofike ku gjendet arsimi shqiptar për shkak të veprimeve të qeverisë.
Selia blu me anë të deputetit Luçiano Boçi, deklaroi se mësuesit e gjetën veten në këtë ditë të parë të shkollës të transferuar me përdhunë nga institucionet arsimore ku ata kanë kontribuar me vite.
Kjo situatë, sipas Luçiano Boçit, vjen për shkak se mësuesit po kalojnë në skanerin e dhunës qeveritare, “që kërkon të zbulojë biografi politike, për të kryer shkarkime të reja masive e për të hapur vend për militantët politikë”.
“Sot, qindra mësues u gjendën befasisht të transferuar me përdhunë nga shkollat ku japin kontribut disavjeçarë, për t’u zevëndësuar me militantë e klientelë”, ka thënë Boçi.
Shantazhimi i mësuesve në zgjedhjet e fundit reflektohet edhe në raportin e fundit të ODIHR, ku sipas, deputetit Boçi, “e vërteta është shkruar e zezë mbi të bardhë”.
Vërejtje kanë pasur demokratët edhe për kushtet e shkollimit të fëmijëve, ndërsa kanë kujtuar se janë “me mijëra fëmijë në kampet e refugjatëve në Europë, të larguar nga vendi, sepse kjo qeveri u ka prerë shpresën dhe besimin për të ardhmen”. /tesheshi.com/
