Dita Ndërkombëtare e Përkujtimit të Holokaustit mbahet sot në mbarë botën, duke përkujtuar ditën kur, në fund të Luftës së Dytë Botërore në vitin 1945, Ushtria e Kuqe Sovjetike çliroi Aushvic-Birkenau në Poloni, kampin më famëkeq të vdekjes në Evropën e skllavëruar.
Me rezolutën e Asamblesë së Përgjithshme të Kombeve të Bashkuara më 1 nëntor 2005, u theksua se 27 janari shënohet si Dita Ndërkombëtare e Përkujtimit të Viktimave të Holokaustit.
Në New York, pak më parë në East River, Sekretari i Përgjithshëm i OKB-së së bashku me ambasadorin e Izraelit në OKB dhe kryetarin e Qendrës Botërore të Kujtimit të Holokaustit Yad Vashem hapën ekspozitën “Libri i emrave të viktimave të Holokausti Yad Vashem”, i cili rendit në rend alfabetik emrat e secilit prej rreth 4.8 milionë viktimave të dokumentuara dhe të konfirmuara aktualisht nga Yad Vashem.
Për ekzekutimin sistematik të rreth gjashtë milionë hebrenjve në Luftën e Dytë Botërore nga viti 1939 deri në 1945, termi më i zakonshëm sot është Holokaust, nga fjala e lashtë greke “holokauston” ose “i djegur plotësisht”.
Kampi i Aushvicit u ndërtua nga autoritetet pushtuese gjermane pranë qytetit polak të Oświęcim (Auschwitz në gjermanisht) në vitin 1940, fillimisht si një kamp për të burgosurit polakë, por shumë shpejt filloi të luante një rol kyç në planin monstruoz të Hitlerit për të vrarë të gjithë hebrenjtë evropianë si pjesë e “zgjidhjes përfundimtare të çështjes hebraike”.
Dhe pikërisht nga kjo ngjarje, kanë buruar dy linja, dy ideologji shtetërore, njëra izraelite e njëra ruse. E para, ajo që ndryshe quhet sioniste, ndjek prej dekadash një politike persekutuese ndaj elementit palestinez, duke e shndërruar këtë të fundit në një popull tragjik në mbi 50 vjet, duke u marrë tokën dhe jetën.
E dyta, ajo ruse, ka vetëushqyer mitin si “shpëtimtare e botës”, ose ndryshe ta delirit të madhështisë dhe manisë së persekucionit(nga Perëndimi), për çka është gati t’i vërë flakën botës. /tesheshi.com/
