Nga Mensur Krasniqi
Edhe pse prej vitesh në Maqedoni organizohet Dita e Drurit – siç u organizua dhe ditë më parë – ambientalistët shprehin rezerva ndaj të dhënave qeveritare mbi gjelbërimin, shprehur në fidanë të mbjellë. Ndërkohë, edhe shoqërinë maqedonase ekziston bindja e përgjithshme se qytetet po betonizohen. (shih krahasimet në foto).
Kreu i “Eco Guerilla”-s, Arianit Xhaferi tha se ekzistojnë dyshime për manipulme të qeverisë me shifrat e mbjelljes së fidaneve; ose që sipas tij bëhet fjalë për degë të vdekura drunjsh që nuk mbinë asnjëherë.
“Maqedonia një kohë më të gjatë ka nisur të shënojë Ditën e Drurit ku mbillen miliona fidane çdo vit dhe përsëri paraqitet nevoja për mbjellje të reja. Dyshimet kryesore janë se numri i fidaneve të mbjella është i stërfryrë, por edhe shumica e atyre fidaneve që mbjellen janë në fakt degë të vdekura drunjsh të cilat nuk mbinë kurrë. Ajo foto tregon qartë se qeveria e Maqedonisë nuk ka prioritet rikthimin e pyjeve por betonizimin e çdo hapësire të gjelbër”, deklaroi Arianit Xhaferi për portalin tesheshi.com
Nga ana tjetër ambientalisti dhe profesori universitar, Afrim Osmani vlerëson se urbanizimi dhe industrializimi janë domosdoshmëri artificiale e kohës bashkëkohore të jetës së njeriut, megjithatë ana negative e tyre është ndikimi i madh në mjedisin jetësor.
“Urbanizimi, industrializimi si dhe komunikacioni janë vetëm disa nga faktorët artificial pa të cilët edhe jeta e njeriut është e pamundur të zhvillohet në mënyrën e duhur, në njërën anë, por fatkeqësia e këtyre faktorëve është se ndikojnë negativisht në mjedisin jetësor. Pra, paraqiten si faktorë ndotës të mjedisit jetësor, për arsye se drejtpërdrejtë ndikojnë në shkatërrimin e vlerave ekologjike (ajrit, ujit dhe tokës). Urbanizimi, mes tjerash nënkupton edhe ngritjen e objekteve dhe ndërtesave të reja, por ngritja e çdo objekti-ndërtese ka edhe pasojat e veta, siç janë: shkatërrimi i gjelbërimeve, prerja e drunjve, vibracionet, etj”, deklaroi për tesheshi.com Afrim Osmani.
Andaj, në vazhdim Osmani bëri apel tek çdo institucion, por edhe çdo investitor, që para se të fillojë me ndërtimet e objekteve, t’i marrin parasysh pasojat ekologjike që mund të shkaktohen nga këto ndërtime. Sipas tij duhet të ndalohet rreptësisht ngritja e objekteve nëpër qendrat e qyteteve; të vihet moratorium për ndërtime që janë në realizim të sipër; të mos shkatërrohen gjelbërimet; të mos prehen drunjtë; të shpallen zona të tëra të gjelbërta në çdo qytet; etj, kurse ndërtimeve të reja t’u jepet mundësi në hapësira ku nuk dot vjen në shprehje ndotja e ambientit jetësor. /tesheshi.com/
