iNë Ditën e Drejtësisë, presidenti Meta, njeriu që nga mazhoranca e konsideron si ndër armiqtë e të resë pas reformës, gjeti rastin t’i kujtojë kësaj të fundit lënien e vendit pa Gykatë Kushtetuese, pikërisht si pasojë e Reformës në Drejtësi, kontestuar prej tij.
Sot, 107 vjet pas ‘Kanonit të Zhurisë’, duhet të vazhdojmë të mbrojmë edhe me më shumë forcë dhe vullnet, parimet kushtetuese për një gjyqësor të pavarur dhe funksional që meriton secili qytetar, nën frymën e Kushtetutës së miratuar prej tyre me referendum që prej datës 22 Nëntor 1998.
Një urim i veçantë edhe për Komisionin e Venecias që pikërisht sot, në të njëtën ditë, feston 30 vjetorin e krijimit të tij. Në këtë ditë të shënuar më lejoni të veçoj një pjesë nga deklarata e Presidentit të Komisionit të Venecias, zotit Gianni Buquiçhio dhënë me rastin e 30-vjetorit të këtij organizmi.
“… Pavarësisht këtij suksesi, mbeten ende shumë sfida dhe kriza aktuale Covid-19 na kujton se progresi nuk është kurrë i pakthyeshëm. Ne duhet të mbrojmë demokracinë pluraliste dhe të parandalojmë degjenerimin e saj në një regjim autoritar, ku fituesi i merr të gjitha. Sipas mendimit tim, Komisioni është i nevojshëm tani më shumë se kurrë më parë, për të mbrojtur dhe promovuar, në partneritet me organet e Këshillit të Europës dhe Bashkimit Europian…”, shkroi Meta në mesazh.
Por nga ana tjetër, një ndër arkitektët e reformës, ish-ministri Xhafaj, kujtoi se drejtësiae djeshme duhet harruar, pasi nuk kthehet më.
“Ata që e duan siç e kishin DJE ta harrojnë! Ajo vdiq. Ata që edhe NESËR e duan si dje, s’paskan kuptuar ende asgjë nga reforma. E mendojnë e veprojnë gabim. Është ndërtuar e tillë që të jetë ndryshe dhe për ta. Drejtësi të barabartë për të gjithë, drejtësi në shërbim të qytetarëve”, shkroi Xhafaj. /tesheshi.com/
