Kuvendi i Kosovës ka vijuar traditën e dyerve të hapura me rastin e Ditës Ndërkombëtare të Demokracisë.
Me këtë rast, grupe nxënësish dhe qytetarë vizituan institucionin më të lartë ligjvënës në vend.
Përshtypjet e nxënësve ishin të ndryshme posa hynin në sallën plenare, aty ku deputetët diskutojnë për projektligje, debate parlamentare, përplasje mes tyre apo me kabinetin qeveritar.
Vedat Aliu, nxënës në shkollën e mesme të ulët “Jeronim De Rada” nga Ferizaj, bashkë me shokët e shoqet e tij, kishin ardhur për të vizituar atë që duhet tempull i demokracisë, Kuvendin, pikërisht në ditën ndërkombëtare të Demokracisë.
Për Aliun, ishte hera e parë që po ulej në vendet e deputetëve të Kuvendit, ku i la përshtypje se nga aty ngrihet zëri i qytetarëve.
Por, pati edhe përshtypje të këqija, pasi nga ato vende u gjuajt me gaz lotsjellës, skena për të cilat thotë se nuk i kanë pëlqyer.
Aliu pret perspektivë me të mirë për rininë, vende të reja pune, e zhvillim ekonomik, shkruan “Kosova Press”.
Edhe Xhevat Xhemajli, mësues në shkollën “Jeronim De Rada” thotë se nxënësit u ndien të kënaqur me vizitën në Kuvendin e Kosovës, por shpreson që rinia të mos shohë skena si ato të legjislaturës së kaluar.
Deputeti i PDK-së, Zenun Pajaziti, i cili bëri hapjen zyrtare të aktiviteteve tha se Kuvendin do ta mbajnë të hapur gjithmonë për të gjithë.
Ndërsa, sekretari i Kuvendit, Ismet Krasniqi, u shpreh se aktivitet që janë organizuar sot përcjellin mesazhe për rëndësinë e këtij institucioni, për të promovuar paqen dhe stabilitetin, meqë edhe moto e këtij viti është “Demokracia dhe Parandalimi i Konfliktit”. /tesheshi.com/
