Politika qeverisëse në Kosovë, siç duket e ka më fort dëshirë që t’ja bëjë dhuratë sekretares Nuland, Demarkacionin me Malin e Zi, pasi zyrtarja e lartë amerikane mbërrin nën fundjavë në Prishtinë.
Kjo, edhe në funksion të marrjes së vizave.
Kryekuvendari Veseli, paralajmëroi se do ketë seancë më 7 korrik, pikërisht për ratifikimin e Demarkacionit.
“S’ka pushim pa u kryer obligimet”, tha ai. Dhe sipas Veselit, nuk është mirë të dëmtohen raportet fqinjësore.
“Mali i Zi është njëri ndër shtetet e para që e ka njohur pavarësinë e Kosovës. Por 1978, bashkëkombasit tonë kanë pasur probleme tjera. Duhet t’i lëmë folklorizmat me raportet tona fqinjësore. E respektojmë sovranitetin e tyre”, ka thënë Veseli.
Veseli tha se çështja e Demarkacionit do të jetë në interes të të dyja palëve, pasi sipas tij që asnjë centimetër nuk do të shkoj në dëm të Kosovës.
Demarkacioni është shpallur nga ndërkombëtarët si kusht për “vizat”, por opozita kosovare, si dhe një pjesë e opinionit, janë shprehur kundër këtij pazari politik, që sipas tyre është në dëm të territorit të Kosovës. /tesheshi.com/
