Klasa politike shqiptare vazhdon të mbajë qëndrime “kokëfortë” , sipas versioneve të tyre, lidhur me ditën e çlirimit të shtetit shqiptar. Edhe në këtë 104-vjetor të djathtët e të majtët festojnë të ndarë. Por, ky gjest tashmë duhet të hidhet pas krahëve dhe të lihen mënjanë inatet e vjetra, në një ditë si kjo. Ka qenë ky mesazhi i kryetarit të kuvendit, Ilir Meta nga Shkodra, qyteti nga i cili, ai zgjodhi të uronte të gjithë shqiptarët.
Në një prononcim për median, Meta tha se 28 Nëntori është një datë e rëndësishme në historinë tonë, por dhe kuptimplotë për të ardhmen evropiane.
“Për mua është një kënaqësi për t’ju uruar të gjithëve ju, gëzuar Festën e 28 Nëntorit! Festë mjaft e rëndësishme në historinë e vendit tonë, por edhe mjaft kuptimplotë për të ardhmen evropiane të vendit tonë, e cila mendoj se është edhe më e sigurt në këtë festë dhe shpresojmë që të ecim në këtë rrugë”, – u shpreh kryetari i Kuvendit.
I pyetur nga gazetarët se deri kur klasa politike shqiptare do të vazhdojë të festojë e ndarë 28 dhe 29 Nëntorin, Meta bëri apel që kjo kulturë e vjetër e ndarjeve duhet t’i takojë të kaluarës. “Mendoj se kultura e vjetër e ndarjeve dhe përjashtimeve duhet t’i takojë të kaluarës dhe 29 Nëntorin nuk e keni vendosur ne. Atë e kanë vendosur ata që çliruan Shqipërinë. Kështu që kjo është një ditë që i fton të gjithë për të nderuar ata që sakrifikuan për çlirimin e vendit”, – deklaroi Kryetari i Kuvendit, Ilir Meta nga Shkodra./tesheshi.com/
