Në ditën e 30 të protestës, kreu i PD-së, Lulzim Basha ka akuzuar mazhorancën se është pikërisht ajo që po tenton destabilizimin. Kjo duke marrë shkas nga një deklaratë-akuzë e një dite më parë nga ana e kreut të grupit parlamentar të PS-së, Gramoz Ruçi, sipas së cilit protesta e opozitës po e çon vendin drejt destabilizimit si në vitin ’97.
Reagimi i Bashës ka qenë i ashpër, duke përdorur dhe shprehje si “surratsëz”, por pa u kuptuar nëse e ka patur fjalën për Ramën apo Ruçin.
Ndërkohë, ka kthyer edhe akuzën e kahershme adresuar të majtës si shkaktare e ngjarjeve të atij viti.
“Sot ky njeri u thotë shqiptarëve o zgjedhje me krimin e drogën, ose përndryshe, ky kërcënon me destabilitet, ky dhe ustallarët që i vunë flakën Shqipërisë 20 vite më parë, sot kërcënojnë këtë lëvizje paqësore, demokratike dhe popullore. Surratsëzët, fytyra kriminale e Shqipërisë, turpi i Shqipërisë kërcënon popullin, këtë lëvizje qytetare dhe u thotë o të bëj zgjedhje fasadë, me krimin, me trafikantët, me deputetët dhe krerët e bashkisë, narkotrafikantë, përdhunues, vrasës me xhelatët e diktaturës ose do destabilizojë Shqipërinë, kë kërcënon mor surratsëz? Kujt i kujton ‘97 ti? Këtu është lëvizja më europiane, më qytetare, më paqësore më demokratike për të shporrur krimin dhe kriminelët që janë destabilizimi”, tha Basha. /tesheshi.com/
