Në ditën e 12-të të protestës kryetari i PD-së u shpreh optimist se kauza që ka mbledhur në çadrën përpara kryeministrisë qytetarë dhe mbështetës të opozitës, po triumfon. Sipas tij, fitorja është e pashmangshme. Ndërkaq, Basha foli edhe për krijimin e një xhandarmërie shqiptare për të rikthyer, siç tha, ai kontrollin e vërtetë të territorit
“Pjesë e këtij plani kombëtar është dhe krijimi i xhandarmërisë kombëtare shqiptare si një bashkëpunim mes forcave të armatosura të Republikës së re dhe forcave të policisë për të mundësuar që mijëra bij e bija shqiptare me përgatitjen e duhur dhe investimet e taksapaguesve të marrin pjesë krah për krah policisë së shtetit për të siguruar rendin dhe luftën kundër drogës në çdo pëllëmbë të territorit. Ne do të rikthejmë kontrollin e vërtetë të territorit, e të kufijve. Shqipëria do të jetë sërish një vend i sigurtë”, tha Basha.
Opozita e ka zgjeruar sot spektrin e formës së protestës, duke hedhur miell në drejtim të kryeministrisë. Mielli është hedhur në distancë sapo kryetari i PD, Lulzim Basha ka përfunduar fjalën e tij. /tesheshi.com/
