Dita Botërore e Bletëve festohet sot në të gjithë botën me synimin për të paralajmëruar për uljen e numrit të tyre dhe për të rritur ndërgjegjësimin për rëndësinë e tyre.
Data e sotme u zgjodh për të përkujtuar lindjen e Anton Janshës në 1743, një bletar slloven që konsiderohet babai i bletarisë moderne.
Kombet e Bashkuara (OKB) njohën rëndësinë e bletëve në ekosistem dhe shpallën 20 majin si Ditën Botërore të Bletës. Duke miratuar rezolutën e propozuar nga Sllovenia dhe të mbështetur nga të gjithë anëtarët e BE-së dhe shumë vende të tjera të botës, OKB-ja e shpalli këtë datë me qëllim të ndërgjegjësimit për rëndësinë e tyre dhe paralajmërimit për uljen e numrit të bletëve në botë.
Vendimi për të festuar Ditën Botërore të Bletës u mor nga Asambleja e Përgjithshme e OKB-së në fund të vitit 2017 me rezolutën e 155 bashkë-sponzoruesve, përfshirë Bashkimin Evropian, SHBA-në, Kinën dhe Rusinë.
Bletët dhe pjalmuesit e tjerë janë thelbësorë për zinxhirin ushqimor global. Ato jo vetëm që sigurojnë sigurinë ushqimore, por kryejnë edhe aktivitete ekonomike me vlerë 577 miliardë dollarë, vlerësoi Platforma Ndërqeveritare e Shkencës-Politikave për Shërbimet e Biodiversitetit dhe Ekosistemit (IPBES). Bletët janë një pjesë kyçe e shumë ekosistemeve dhe janë një tregues i mirë i shëndetit të ekosistemit.
Numri i pjalmuesve në Evropë është ulur në 30 vitet e fundit me tre të katërtat. Shumë shkencëtarë besojnë se rritja e përdorimit të pesticideve ishte vendimtare. /tesheshi.com/
