Mendoni vetëm kaq: Barcelona në fundjavë mundet nga një skuadër debutuese, e më shumë se modeste, në kampionatin spanjoll, dhe në Champions bën çfarë t’i dojë qejfi me një emblemë të futbollit britanik!
Champions League sa vjen e bëhet më i parashikueshëm, më pa befasira, më i mërzitshëm. Shtoji kësaj dhe një pjesëmarrje dominuese, të garantuar, të ekipeve të ligave kryesore të Europës në vitet e ardhshme, atëherë është e lehtë të kuptohet se çfarë do të ngjasë. Aktiviteti dalëngadalë do të fillojë të shihet vetëm nga bastexhinjtë, ndërkohë që të dhënëve pas lojës si të tillë ka nisur t’u mungojë interesi për të ndjekur ndeshje me fund pak a shumë të ditur.
Barcelona shkatërroi mbrëmë Sëlltikun, siç bëri Bajerni i Mynihut ndaj Rostovit, në ndeshjet e para në grupe të Champions League-s së këtij sezoni.
Orteku i Barcelonës nisi herët, që në minutën e tretë, për të marrë fund në të 88-tën. Protagoniste qe treshja e famshme: Messi, Neymar e Suarez.
Argjentinasi shënoi një tregolësh, i gjashti për të në këtë veprimtari. Braziliani u mjaftua me një gol, e dy të tillë shënoi uruguajani. Një gol realizoi dhe Iniesta, madje mjaft të bukur.
Momenti kyç i ndeshjes qe minuta e 24-t, kur Dembele nuk realizoi nga pika e 11-metërshit për skocezët e Sëlltikut.
Bajerni i Mynihut nuk la vend po ashtu për dilemë, duke fituar thellë, 5-0, ndaj Rostovit.
Rusët kishin eliminuar Ajaksin në play-off, por nuk kanë patur të njëjtin fat ndaj bavarezëve. I riu Kimmich qe protagonist me dy golat e tij. Nuk munguan të shënojnë në “Allianz Arena” dhe Lewandowski, Müller e Bernat.
Tre barazime janë regjistruar në takimet e së martës: PSG – Arsenal, Benfika – Beshiktash dhe Bazel – Ludogorec kanë përfunduar 1-1.
Napoli ka siguruar një trepikësh të çmuar në transfertë ndaj Dinamos së Kievit, duke fituar 1-2. Atletiko e Madridit ia ka dalë të fitojë 0-1 ndaj PSV Eindhovenit.
Përmbytja e fushës nga rreshjet e ka shtyrë për sonte sfidën mes Mançester Sitit dhe Borusias së Mynshegladbahut. /tesheshi.com/
